[Custodes.]--Roger Desert. Anno s'c'do.
Jacob' Fitz Barthi.
[Sidenote: Parlement at Londoun.]
[Sidenote: S'cus Hugo de Lincoln isto anno monebat'.]
This yere the kyng held his parlement at Londone, and asked of the
clergye the stynte of every chirche in Engelond for to conquere ayen
Normandye and Angoye. And in this yere deyde Huberd erchebisshop of
Caunterbury; and thanne the priour and the covent of Caunterbury
chosen in there chapytre hous the noble clerk Stephen of Langeton,
ayens the kynges will, whome the pope sacred at Viterke. And this yere
deide seynt Hughe of Lincoln; also the erchebysshopp of Caunterbury;
and the priour of Cricherche, and all the monkes weren exiled.
[Custodes.]--William Fitz Alice. Anno tercio.
Simon de Aldermanb'y.
This same yere, be the avyse of wyse men of the citee of London that
were chosene xxxv men whiche were sworne to holde and mayntene with
the maire the assyses.
[Custodes.]--Normane Bloundene. Anno iiij^{to}.
John of Ely.
[Sidenote: Hailstones grete:]
[Sidenote: and foules were seyn berynge fyer in the eyr in there
billes.]
In this yere of oure lord a m^{l}'ccij, there fallen grete reynes, and
hailstones as gret as an ey medlyd with reyn, where thorugh trees,
vines, cornes, al manner frutes were moche distroied; and the peple
were sore abaysshed, for there were seyn foules fleynge in the eyre
berynge in there billes brennyng coles, whiche brenden manye houses.
And in this yere Engelond and Walys were enterdited, and stood so vj
yere and more, for the kynges trespas.