Custodes.--Robert Besaunt. Anno vij^{o}.
Jokell le Josne.
[Custodes.]--Gerard de Antiloche. Anno viij^{o}.
Robert Duraunt.
[Sidenote: An heretike with the long berde.]
In this yere the kyng come in to Engelond, and tok the castell of
Notynghame, and disherited John his brother. And the same yere kyng
Richarde was crowned ayeyne at Westm'. And in the same yere an
heretyke called with the longe berd was drawen and hanged for heresye
and cursed doctrine that he had taughte
[Custodes.]--Roger Blount. Anno ix^{o}.
Nicholl Doket.
[Sidenote: Ordre of the Trynyte.]
[Sidenote: Slewe the frenche king.]
The same yere, the yere of oure lorde a m^{l}'clxxxxviij, began the
ordre of Trynyte. The same yere deyde pope Celestyne; and thanne
succeded Innocent. And in this yere kyng Richard seiled over the see
into Normandye and sclewe the kyng of Fraunce.
[Custodes.]--Constantyne Fitz Arnulf. Anno x^{mo}.
Robert le Beale.
[Sidenote: Rex Ric'us int'fectus fuit ap'd Castru' Gaillard in
France.]
[Sidenote: Bertram Gordon.]
In this yere, that is to sey the yere of oure lord a m^{l}'cxxxxix,
the kyng was sclayne atte the castell Gaillarde in Fraunce with schot
of a venemed quarelle in the heed. Neverthelees or he deyde the
castell was wonne and his body setthe entered at Pount Ebrarde with
hys fadir Henry the secounde. Whan the kyng Richard was thus hurt,
with his owne hand he pulled out the quarelle, and anon the wonde
rancled; and whan the kyng wyste that his wounde was dedly, he
comaunded anoone his peple scharply assawte the town, and so it was
wonne: and the kyng dede his will with them that were withinne: among
othere he lete comaunde hym to be brought before hym that schotte that
quarrelle; and whanne he cam the kyng asked his name. Sire, seide he,
my name is Bertram Gordone. Wherfore, seide the kyng, have ye sclayne
me? dede y yow ever ony harme? Nay, sire, q'd Bertram; but, sire, with
youre owne hond ye sclowe my fadir and my brothir, the whiche y have
quytte yow. Now thanne, q'd the kyng, he that deyde for us on the
crosse he save us from helle, he foryef yow my deth, and y foryef it
yow. And the kyng comaunded hym an hundred schillynges of silver, and
chargyd upon lyf and membre that no man schulde dow hym non harme:
natheless certeyn persones of the kynges hous sued after hym and sclow
hym after his departyng. And so kyng Richard obite is the vj day of
April.
* * * * *
NOMINA COSTODUM TEMPORE REGIS JOH'IS QUI CORONATUS FUIT APUD WESTM' IN
DIE ASCENSIONIS D'NI, ANNO M^{l}' C^{mo} NONAGESIMO NONO.