[From _A Pilgrimage to the Land of Burns, and Poems_ (Paisley,
Scotland, 1892)]
I left ye, Jeanie, blooming fair,
'Mang the bourocks o' Bargeny; [bowers]
I've found ye on the banks o' Ayr,
But sair ye're altered, Jeanie.
I left ye 'mang the woods sae green,
In rustic weed befitting;
I've found ye buskit like a queen, [attired]
In painted chaumbers sitting. [chambers]
I left ye like the wanton lamb
That plays 'mang Hadyed's heather;
I've found ye noo a sober dame,
A wife and eke a mither.
Ye're fairer, statelier, I can see,
Ye're wiser, nae dou't, Jeanie;
But ah! I'd rather met wi' thee
'Mang the bourocks o' Bargeny.