In Gloriosam Mortem
Magnanimi Equitum Ducis
Joseph Hamilton Daviess, Patrii Amoris Victimæ
In Tippecanoe Pugna ad Amnem
Wabaschum, 7. Die Nov. 1811.
Epicedium;
Honorabili Viro Joanni Rowan
Meo Ipsiusque Amico Dicatum.
[From _The Kentucky Gazette_ (February 18, 1812)]
Autumnus felix aderat granaria complens
Frugibus; umbrosas patulis jam frondibus ulmos
Exuerat brumoe proprior, cum Fama per orbem
Non rumore vago fatalia nuncia defert:
"Sub specie pacis Slyvæcola perfidus atra
"Nocte viros inopino plumbo occidit et hasta;
"Dux equitum triplici confossus vulnere, fortis
"Occubuit; turmoe hostiles periere fugatoe,
"Hostilesque casas merito ultrix flamma voravit."
Mensibus Æstivis portenderat ista Cometes
Funera; Terra quatit repetitis motibus; ægre
Volvit sanguineas Wabaschus tardior undas
Ingeminant Dryades suspiria longa; Hymenoeus
Deficit audita clade, et solatia spernit
Omnia; triste silet Musarum turba; fidelis
Luget Amicities, lugubri tegmine vestit
Et caput et lævam, desiderioque dalentis
Non pudor aut modus est. Lacrymas at fundere inanes
Quid juvat? Heu lacrymis nil Fata moventur acerba!
Ergo piæ Themidis meliora oracula poscunt
Unanimes; diram causam Themis aure benigna
Excipit, et mox decretum pronunciat oequum:
"Davidis effigies nostra appendatur in aula;
"Tempora sacra viri quercus civilis adornet,
"Ac non immeritam jungat Victoria laurum.
"Signa sui Legislator det publica luctus;
Historioe chartis referat memorabile Clio.
"Prælium, et alta locum cyparissus contegat umbra.
"Tristis Hymen pretiosa urna cor nobile servet;
"Marmoreo reliquos cineres sincera sepulcro
"Condat Amicities; præsens venturaque laudet
"Ætas magnanimum David, virtute potentem
"Eloquii, belli et pacis decus immortale."
Vita habet angustos fines, et gloria nullos:
Qui patrioe reddunt vitam, illi morte nec ipsa
Vincuntur; virtutum exempla nepotibus extant.
Pro Patria vitam profundere maxima laus est.
Stephanus Theodorus Badin,
Cathol. Mission.
Moerens canebat 15. Dec. 1811.