Had I the wyte, had I the wyte,
Had I the wyte? she bade me;
She watch’d me by the hie-gate side,
And up the loan she shaw’d me.
And when I wadna venture in,
A coward loon she ca’d me:
Had Kirk an’ State been in the gate,
I’d lighted when she bade me.
Sae craftilie she took me ben,
And bade me mak nae clatter;
“For our ramgunshoch, glum gudeman
Is o’er ayont the water.”
Whae’er shall say I wanted grace,
When I did kiss and dawte her,
Let him be planted in my place,
Syne say, I was the fautor.
Could I for shame, could I for shame,
Could I for shame refus’d her;
And wadna manhood been to blame,
Had I unkindly used her!
He claw’d her wi’ the ripplin-kame,
And blae and bluidy bruis’d her;
When sic a husband was frae hame,
What wife but wad excus’d her!
I dighted aye her e’en sae blue,
An’ bann’d the cruel randy,
And weel I wat, her willin’ mou
Was sweet as sugar-candie.
At gloamin-shot, it was I wot,
I lighted on the Monday;
But I cam thro’ the Tyseday’s dew,
To wanton Willie’s brandy.
Does Haughty Gaul Invasion Threat?
Tune—“Push about the Jorum.”
Does haughty Gaul invasion threat?
Then let the louns beware, Sir;
There’s wooden walls upon our seas,
And volunteers on shore, Sir:
The Nith shall run to Corsincon,
And Criffel sink in Solway,
Ere we permit a Foreign Foe
On British ground to rally!
We’ll ne’er permit a Foreign Foe
On British ground to rally!
O let us not, like snarling curs,
In wrangling be divided,
Till, slap! come in an unco loun,
And wi’ a rung decide it!
Be Britain still to Britain true,
Amang ourselves united;
For never but by British hands
Maun British wrangs be righted!
No! never but by British hands
Shall British wrangs be righted!
The Kettle o’ the Kirk and State,
Perhaps a clout may fail in’t;
But deil a foreign tinkler loun
Shall ever ca’a nail in’t.
Our father’s blude the Kettle bought,
And wha wad dare to spoil it;
By Heav’ns! the sacrilegious dog
Shall fuel be to boil it!
By Heav’ns! the sacrilegious dog
Shall fuel be to boil it!
The wretch that would a tyrant own,
And the wretch, his true-born brother,
Who would set the Mob aboon the Throne,
May they be damn’d together!
Who will not sing “God save the King,”
Shall hang as high’s the steeple;
But while we sing “God save the King,”
We’ll ne’er forget The People!
But while we sing “God save the King,”
We’ll ne’er forget The People!