[235] Jehans de Viane et messires Jehans de Rays et li amiraus
d’Espagne herrioient le pays et mettoient grant
entente et grant painne à ce que il peuissent prendre
terre sus Engleterre à leur plus grant avantage. Et
5 tant alèrent en cel estat, qu’il vinrent à un bon gros
village sus mer, et où il y a une bonne riche priorie,
que on dist Lyaus. Là estoient les gens dou pays
venu et recueillié avoeques le prieus de Lyaus et deus
chevaliers, par le quel conseil il se voloient ordonner
10 et combatre, se li François venoient. Li chevalier
estoient nommet messires Thomas Cheni et messires
Jehans Afasselée. Là ne peurent li contes de Sallebrin
ne ses frères venir à temps, pour les divers chemins
et le mauvais pays qui est entre Lyaus et le marce,
15 où il se tenoient. Là vinrent à ce port li dessus dit
François et leurs gallées moult ordonneement et ancrèrent
dou plus priès de terre qu’il peurent, et prisent
terre, vosissent ou non li Englès, qui leur deffendirent
ce qu’il peurent. Là eut à l’entrer en la
20 ville grant hustin et force escarmurce et pluiseurs
hommes navrés des François à ce commencement
par le trait; mais il estoient si grant fuison qu’il
reculèrent leurs ennemis, li quel se recueillièrent moult
faiticement en une place devant le moustier, et attendirent
25 leurs ennemis, li quel s’en vinrent sus yaus
hardiement combatre main à main très ordonneement.
Là furent faites pluiseurs grans apertises
d’armes des uns et des aultres, et se deffendirent li
Englès moult bien selonch leur quantité, car il n’estoient
30 que un petit ens ou regard des François: si se
prendoient priès de bien faire la besongne. Ossi li
François avoient, avoecques le bon desir, grant entente
[236] d’yaus porter damage. Là obtinrent il le place,
et furent li Englès desconfi, et en y eut bien deus
cens mors et grant fuison de pris des plus notables,
riches hommes de le marce, qui là estoient venu
5 pour leur corps avancier; et furent pris li doi chevalier
et li prieus. Si fu li ville de Lyaus toute courue,
arse et destruite, et aucun petit village marcissant
illuech. Et puis, quant la marée fut revenue, il
estoient ja rentré en leurs vaissiaus, il se desancrèrent,
10 et si se partirent de Lyaus et en menèrent leur
pillage et leurs prisonniers, par les quels il sceurent
la mort dou roy d’Engleterre et le couronnement
dou roy Richart.
Adont messires Jehans de Viane s’avança de segnefiier
15 ces nouvelles au roy de France. Si fist partir un
sien chevalier et trois escuiers, qui portoient lettres
de creance, en une grosse barge espagnole qui traversa
la mer, et vint arriver au Crotoi desous Abbeville:
là prisent il terre, et montèrent as chevaus, et
20 chevaucièrent viers la cité d’Amiens sans entrer en
Abbeville, et esploitièrent tant par leurs journées que
il vinrent à Paris. Là trouvèrent il le roy [de France],
le duch de Berri, le duch de Bourgongne et le duch
de Bourbon, et grant fuison de nobles signeurs: si
25 fisent leur message bien et à point, et furent bien
creu parmi les lettres de creance qu’il portoient.
Quant li rois de France sceut le mort de son adversaire
le roy d’Engleterre, et le couronnement dou roy
Richart, si ne fu mies mains pensieus que devant,
30 non que ce li touchast noient, mais il se voloit
acquitter de le mort son cousin le roi d’Engleterre,
le quel, le paix durant, il appelloit frère; et
[237] li fist faire son obsèque ossi poissamment et ossi
notablement, en le Sainte Chapelle de Paris, que dont
que li rois d’Engleterre euist esté ses cousins germains,
et là remoustra li rois de France qu’il estoit
5 plains de toute honneur, car il s’en fust bien passés
à mains, se il volsist.
Or parlerons nous de monsigneur Jehan de Viane,
et compterons comment il persevera.
§ 781. Apriès le desconfiture de Lyaus, ensi que
10 vous avés oy, [les François] rentrèrent en leur navie et
singlèrent devers Douvres, où tous li pays estoit assamblés,
et là estoient li doi oncle dou roy, li contes
de Campbruge et li contes de Boukinghen, et bien
quatre cens lances et huit cens arciers, et euissent
15 volentiers veu que li François se fuissent avancié
pour là prendre terre. Et avoient ordené ensi qu’il
ne leur deve[e]roient point à prendre terre pour combatre
mieus à leur aise; car il se sentoient fors assés
pour yaus recueillier. Si se tenoient tout quoi en le
20 ville, ordonné par manière de bataille, et veoient
bien avant en le mer la navie monsigneur Jehan de
Viane, qui approçoit et venoit avoech le mer tout
droit vers Douvres. Si se tenoient li signeur et li Englès,
qui là estoient, pour tout conforté qu’il venroient
25 jusques à là et que il aroient bataille; et furent
voirement devant le havene et droit à l’entrée, et
n’eurent point conseil de prendre là terre, mais tournèrent
leurs singles, et s’en vinrent de celle marée
tout droit devant Calais, et là ancrèrent. De quoi cil
30 de le ville de Calais furent moult esmervilliet, quant
il les veirent si soudainement là venir, et se coururent
[238] tantost armer et appareillier, car il cuidoient
avoir l’assaut, et cloïrent leurs portes et leurs barrières,
et furent en grant effroi; car messires Hues de
Cavrelée, qui pour ce temps estoit chapitainne de
5 Calais, n’i estoit point, mais il revint au soir, car en
che propre jour, il avoit chevaucié hors devant Saint
Omer, en se compagnie messires Jehan de Harleston,
gouvreneur de Ghines, et li sires de Gommegnies,
chapitainne d’Arde. Si fu fais nouviaus chevaliers en
10 celle chevaucie li ainsnés filz le signeur de Gommegnies,
messires Guillaumes: si retournèrent au
soir sans riens faire, fors yaus moustrer ces chapitainnes
en leurs garnisons: si trouva, ensi que je
vous di, messires Hues de Cavrelée celle grosse navie
15 de France et d’Espagne devant Calais. Si fisent bon
ghet et grant, celle première nuit, et à l’endemain,
toute jour furent il armé, car il cuidièrent avoir l’assaut
et le bataille. On supposoit adont en France, et
ossi le cuidièrent bien adont li Englès de Calais, que
20 ceste armée par mer deuist assegier Calais; mais,
quant il eurent là esté à l’ancre huit jours, au
VIIIe jour leur leva uns vens qui les prist soudain[ne]ment,
et les couvint par force partir, tant estoit li
vens fors et durs et mauvais, et li fortune de le mer
25 perilleuse. Si se desancrèrent et levèrent les singles, et
se misent aval vent. Si furent moult tost eslongié, et
vinrent de celle course prendre terre et ferir ou havene
de Harflues en Normendie. Ensi se desrompi
pour celle saison li armée de mer dou roy de France;
30 ne je n’ai point oy parler qu’il en fesissent plus en
grant temps.
[239] § 782. Vous avés bien oy parler et recorder comment
messires Jehans de Graili, dis captaus de Beus,
fu pris devant Subise en Poito de l’armée Yewain
de Galles et Radigho de Rous, et comment il fu
5 amenés à Paris comme prisonniers et mis en le tour
dou Temple, et là bien gardés. Trop de fois li rois
d’Engleterre et ses consaulz offrirent pour li le conte
de Saint Pol et encores trois ou quatre [chevaliers]
prisonniers, qu’il n’euissent mies rendus pour cent
10 mil frans, mais li rois de France n’en voloit riens
faire; car il sentoit le captal de Beus trop durement
un bon chapitainne de gens d’armes et grant guerrieur,
et que par lui, se il estoit delivrés, se feroient
trop de belles recouvrances et recueilloites de gens
15 d’armes, car, sus cinc jours ou huit, uns tel chevaliers
comme le captal, estoit bien tailliés, par se hardie
emprise, d’entrer en un pays et de courir et de
porter cent mil ou deus cens mil frans de damage.
Se le voloit tenir en prison, et li prommettoit bien
20 que jamais ne partiroit de là, se il ne se tournoit françois;
mais, se il voloit estre françois, il li donroit en
France si grant terre et si belle revenue, que bien li
deveroit souffire, et le marieroit hautement et richement.
Li captaus respondoit que ja, se il plaisoit à
25 Dieu, ne feroit ce marchié; et puis remoustroit courtoisement
as chevaliers qui le venoient veoir, comment
on ne li faisoit mies le droit d’armes, quant par
bataille et en servant loyaument son signeur, ensi que
tout chevalier doient faire le leur, il estoit pris, et on
30 ne le voloit mettre à finance, et que ce on vosist remoustrer
au roy de France que on ne li faisoit mies
la cause pareille que li rois d’Engleterre et si enfant
[240] avoient dou temps passet fait à ses gens, tant de monsigneur
Bertran de Claiekin que des autres des plus
nobles de tout le royaume de France, qui n’estoient
mies mort en prison, ensi que on li faisoit morir et
5 perdre son temps villainnement. Li chevalier de
France qui le venoient veoir, au voir dire, en avoient
pité et disoient bien qu’il remoustroit raison; et par
especial, li escuiers qui l’avoit pris, qui s’appelloit
Pières d’Auviller, qui moult apers homs d’armes estoit
10 et qui eu n’en avoit pour se prise que douse cens
frans, disoit bien que on faisoit au captal tort, quant
on ne le mettoit à finance courtoise, selonch son
estat; et en avoit tel pité, où il en ooit parler et comment
il faisoit ses regrés, qu’il amast mieulz que il ne
15 l’euist onques pris.
Si fu en especialité remoustré au roy et priiet par
pluiseurs bons chevaliers de son royaume, que il
vosist estre plus douls au captal que il n’avoit esté;
car, par droit d’armes, toutes gens disoient que on
20 li faisoit tort. Li sires de Couci, sicom je fui adont
enfourmés, y trouva un moiien, car li rois de France
qui adont se rafrena un petit, demanda quel grasce
on li poroit faire; et li dis sires de Couci respondi et
dist: «Sire, se vous li faisiés jurer que jamais ne
25 s’armast contre le royaume de France, vous le poriés
bien delivrer, et se feriés vostre honneur.»--«Et
nous le volons, dist li rois, mais qu’il le voeille.»
Adont fu demandé à monsigneur le captal s’il se vorroit
obligier en ceste composition; li captaus respondi
30 qu’il en aroit avis. En ce terme qu’il s’en devoit
aviser, tant de merancolies et d’abusions le prisent
et aherdirent de tous lés, qu’il en entra en une petite
[241] maladie frenesieuse, et ne voloit ne boire ne mengier.
Si afoibli [du corps] durement, et entra en une
langueur qui le mena jusques à mort. Ensi morut prisonniers
li captaus de Beus. Se li fist faire li rois de
5 France son obsèque moult honnourablement et ensepelir,
pour le bien et pour la vaillance dou dit
captal, et ossi il estoit dou sanch et dou linage dou
roy, dou costé dou conte de Fois et d’Arragon, par
quoi il y estoit le plus tenus.
10 § 783. En celle saison que la guerre de France et
d’Engleterre fu renouvelée, et que messires Jehans de
Viane, sicom chi dessus est dit, couri et ardi en Engleterre,
et qu’il eut esté devant Calais et qu’il se fu
retrais en Normendie, messires Hues de Cavrelée,
15 chapitainne de Calais, et messires Jehans de Harleston,
chapitainne de Ghines, et li sires de Gommegnies,
chapitainne d’Arde, avoecques leurs gens, couroient
souvent sus le pays devant Saint Omer, devant
Tieruane, en le conté de Saint Pol, en le conté
20 d’Artois et de Boulongne; ne riens ne demoroit devant
yaus dehors les forterèces, que tout ne fust pris
et pilliet et amenet en leurs garnisons; de quoi les
plaintes en estoient venues et venoient encores tous
les jours au roy de France. Li rois, à qui ces choses
25 desplaisoient et qui voloit obviier à ce, s’en conseilla
à aucuns de son royaume, comment on poroit à ces
garnisons englesces, estans en le marce d’Artois et de
Calais, porter damage. On li dist que la bastide [d’Arde]
estoit bien prendable, mais que on y alast caudement
30 sans ce que chil de Calais en sceuissent riens; car on
avoit entendu par aucuns [chapitaines et] compagnons
[242] de le garnison qui s’en estoient descouvert,
que elle n’estoit point bien pourveue d’arteillerie;
car li sires de Gommegnies, qui chapitains en estoit,
en avoit esté moult negligens. Ces parolles plaisirent
5 moult bien au roy, et dist que il y envoieroit hasteement.
Lors li fu dit que ce fust secretement, par quoi
nouvelles n’en fuissent ou pays devant ce que on fust
venu là; et, se on pooit tant faire que on l’euist françoise,
on ne se doubtoit noient que on ne deuist
10 tout reconquerre jusques as portes de Calais; et, se
on estoit signeur des frontières, on aroit milleur
avantage pour constraindre Calais.
Adont li rois, tous avisés et pourveus de son fait,
mist sus une grande assamblée de gens d’armes, et
15 escrisi à son frère le duch de Bourgongne qu’il se
traisist à Troies en Campagne, et là fesist ses pourveances,
car il voloit qu’il fust chiés de toutes ces gens
d’armes. Li dis dus obeï au commandement dou roy,
ce fu raisons, et s’en vint à Troies, et là vinrent tout
20 li Bourghegnon qui en furent priiet et mandet, et ossi
delivret et paiiet tout sech de leurs gages pour trois
mois. D’autre part, li rois fist son mandement, à
Paris, des Bretons et des François, et là furent ossi
tout prestement paiiet de leurs gages, et des Vermendisiens
25 et Artisiens en le cité d’Arras. Adont s’avalèrent
li dus de Bourgongne et ses gens de Troies et
vinrent à Paris; si se misent là ensamble Bourghegnon,
Breton et li François, et sceurent adont aucuns
des chapitains, et ne mies tous, quel part il devoient
30 aler. Si se departirent sus le darrainne sepmainne
d’aoust, et s’en vinrent à Arras en Pikardie, et de là
à Saint Omer. Si se trouvèrent bien vint cinc cens
[243] lances de bonne estoffe, pourveu de quanques il
apertenoit as gens [d’armes, et toute fleur de gens]
d’armes, chevaliers et escuiers. Si se departirent de
Saint Omer sus un samedi moult ordonneement et
5 arreement, et s’en vinrent devant Arde.
Cil de le garnison d’Arde ne s’en donnoient de
garde, quant il les veirent tous rengiés et ordonnés
devant leur ville, et si belles gens d’armes, et si grant
fuison que c’estoit grans merveilles. Là estoient
10 avoech le duch de Bourgongne, que je ne l’oublie,
tout premiers, banerès bourghegnons, le conte de
Geneve, le conte de Grantpret, monsigneur Loeis
de Chalon, le signeur de le Rivière, le signeur de
Vregi, monsigneur Thiebaut dou Noefchastiel, messires
15 Hughe de Viane, Pière de Bar, le signeur de
Sombrenom, le signeur de Poises, le signeur d’Englure,
le signeur de Rougemont; et puis banerès bretons,
le signeur de Cliçon, le signeur de Biaumanoir,
le signeur de Rocefort, le signeur de Rieus, messires
20 Charles de Dignant; banerès normans, le signeur de
Blainville, mareschal de France, le signeur de Hanbiie,
le signeur de Riville, le signeur d’Estouteville,
le signeur de Graville, le signeur de Clères, le signeur
d’Ainneval, le signeur de Friauville; banerès françois,
25 monsigneur Jakeme de Bourbon, monsigneur
Hue d’Antoing, le conte de Dammartin, messire
Charles de Poitiers, le senescal de Haynau, le signeur
de Wavrin, le signeur de Helli, le signeur de le Fère,
l’evesque de Biauvais, monsigneur Hue d’Amboise,
30 le signeur de Saint Digier; Vermendisiens, le signeur
d’Aufemont, le signeur de Moruel, le visconte des
Kesnes, le signeur de Fransures, le signeur de Rainneval;
[244] Artisiens, le visconte de Miaus, le signeur de
Villers, le signeur de Cresèkes; et là estoient tout
chil baron en tel arroi et si bien acompagnié, que
merveilles seroit à recorder. Si se logièrent li pluiseur
5 de fueillies, et li aultre de nient fors au nu chiel,
car il voloient moustrer qu’il ne seroient mies là longement
et qu’il assauroient continuelment, car il
fisent drechier et appareillier leurs canons, qui portoient
quarriaus de deus cens de pesant.
10 § 784. Quant li sires de Gommegnies se vei ensi
environnés de telz gens d’armes et de si grant fuison,
dont il ne se donnoit garde, et si sentoit sa forterèce
mal pourveue d’arteillerie, si se commença à esbahir,
et demanda conseil à ses compagnons comment il
15 s’en cheviroit, car il ne veoit mies que longhement
[contre telz gens d’armes] il se peuist tenir. Avoecques
lui estoient troi chevalier de Haynau, assés appert
homme d’armes, messires Eustasses, sires de Viertain,
et messires Pières, [ses frères], et messires Jakemes
20 dou Sart, et pluiseur bon escuier et apert, qui
estoient en bonne volenté d’yaus deffendre.
Che premier jour que li François furent venu devant
Arde, s’en vint li sires de Hangès, uns moult
apers chevaliers vermendisiens, armés de toutes
25 pièces, le lance ou poing, montés sus un coursier,
courir jusques as barrières d’Arde, et dist, quant il
fu là venus en fretillant et remuant son coursier, par
quoi il ne fust avisés dou trait: «Entre vous, Haynuier
englès, que ne rendés vous ceste forterèce à
30 monsigneur de Bourgongne?» Adont respondirent
doi escuier frère qui là estoient, Yreus et Hustins
[245] dou Lay: «Nous ne le renderons pas ensi, non.
Pensés vous que nous soions desconfi pour ce que
vous estes chi venu grant fuison de gens d’armes?
Dittes au duch de Bourgongne qu’il ne l’ara pas si
5 legierement qu’il cuide.» Adont respondi li sires de
Hanghet, et dist: «Sachiés que, se vous estes conquis
par force, ensi que vous serés, il n’est mies doute, se
nous vous assallons, il n’i ara homme nul pris à
merchi; car je l’ay ensi oy dire monsigneur le duch
10 de Bourgongne.» A ces parolles retourna li sires de
Hanghet.
§ 785. Je vous voeil recorder comment cil d’Arde
finèrent. Là estoit en l’ost li sires de Rainneval, cousins
germains au signeur de Gommegnies, qui savoit
15 en partie l’entention dou duch. Si s’avança de venir
vers son cousin, et fist tant que il y eut assegurances
d’yaus deus, et parlementèrent dedens la ville d’Arde
moult longement ensamble; et là remoustra li sires
de Rainneval au signeur de Gommegnies, en grant
20 especialité et fiance de linage, comment li dus et tout
chil de l’ost le maneçoient et ses gens ossi, non pas
pour prendre raençon se par force estoient conquis,
mais de tous faire morir sans merchi: se li prioit qu’il
se vosist aviser et laissier consillier et rendre le
25 forterèce; si s’en partiroient ilz et ses gens sauvement, et
se osteroient de grant peril, car confors ne secours
ne leur apparoit de nul costé. Tant le preeca et sermonna
que sus assegurances il l’amena parler au
duch de Bourgongne et au signeur de Cliçon. Là entrèrent
30 en trettiés, et n’en volt adont li sires de Gommegnies
riens avoir en couvent sans le sceu de ses
[246] compagnons. Si retourna dedens Arde, et remoustra
as chevaliers et escuiers qui là estoient, toutes les
parolles et raisons de quoi on l’avoit aresné, et comment
on les maneçoit: si voloit savoir quel cose il
5 en diroient. Li aucun li consilloient dou rendre, et li
aultre non, et furent plus de deus jours en fait contraire,
et disoient bien li aucun qu’il se porteroient
trop grant blasme, se il se rendoient si legierement
sans estre assalli, et que jamais ne seroient en nulle
10 place creu ne honneré. Li sires de Gommegnies respondoit
que il avoit oy jurer moult especialment le
duch de Bourgongne que, se on aloit jusques à l’assallir,
jamais à yaus rendre ne la forterèce, il ne venroient
à temps qu’il ne fuissent tout mort, se de force
15 il estoient pris: «Et vous savés, signeur, que cheens
n’a point d’arteillerie, qui ne fust tantost alevée.» Là
disoient li compagnon: «Sire, vous en avés mal
songnié; c’est par vostre negligense.»
Adont s’escusoit li sires de Gommegnies, et disoit
20 que ce n’estoit mies sa defaute ne sa coupe, mais
celle dou roy [d’Engleterre, le roy] Edowart et de son
conseil, car il leur avoit bien dit et moustré en celle
anée par pluiseurs fois, comment dedens Arde il en
estoient mal garni: «Et, se de ce il ont esté negligent,
25 ce n’est mie ma coupe, mais la leur, et m’en
vorroie bien escuser par yaus.» Que vous feroi je
lonch parlement de ceste aventure? Tant fu trettié et
pourparlé, parmi l’ayde et pourchac dou signeur de
Rainneval, qui fist tant, que Arde se rendi. Et s’en
30 partirent chil qui partir vorrent, et especialment li
quatre chevalier et tant li compagnon saudoiier, et
furent conduit jusques à Calais de monsigneur Gauwinet
[247] de Bailluel. Si demorèrent chil de le nation de
le ville sans riens pierdre dou leur, et en prisent li
François la saisine et possession, li sires de Cliçon et
li mareschaus de France. Si furent moult resjoï li
5 François et tous li pays de la prise d’Arde.
§ 786. Ce propre jour que Arde se rendi, tout
caudement s’en vinrent quatre cens lances devant un
aultre petit fort, que on dist le Planke, où il avoit
Englès qui le gardoient. Si furent environné de ces
10 gens d’armes, et leur fu dit qu’il ne savoient que
faire de tenir, car Arde s’estoit rendue, et fuissent
tout segur que, se il se faisoient assallir, il seroient
tout mort sans merchi. Quant cil de le Planke oïrent
ces nouvelles, si furent esbahi moult durement, et se
15 conseillièrent entre yaus, et regardèrent que il n’estoient
que un petit de compagnons et n’avoient mies
trop forte place: si valoit trop mieulz que il se rendesissent
salves leurs vies et le leur, puis que Arde estoit
rendue, que il feissent pieur marchié. Si rendirent
20 la forterèce, salve leurs vies et le leur, et furent conduit
oultre parmi ce trettié pour le peril des rencontres
jusques à Calais; puis prisent li François le
saisine de le Planke, et disent entre yaus que bien il
le tenroient parmi l’ayde d’Arde et des aultres forterèces
25 qu’il prenderoient encores. A l’endemain s’en
vinrent li François devant Bavelinghehem, un chastiel
biel et fort en le conté de Ghines, que li Englès
tenoient, et n’i furent mies tout à celle empainte,
car li dus de Bourgongne estoit encores demorés
30 derrière et entendoit as ordenances de Arde et au
regarder quels gens y demorroient, et comment on le
[248] poroit tenir contre les Englès. Chil qui vinrent devant
Bavelinghehem, estoient bien douse cens combatans:
si environnèrent le chastiel et fisent grant
samblant de l’assallir. A Bavelinghehem avoit fossés
5 et grans rouleis, ançois que on peuist venir jusques as
murs; mais chil François, targiet et paveschiet, passèrent
oultre et rompirent les roulleis et pertruisièrent
les murs. Quant li Englès, qui dedens estoient, se
veirent assalli de tel façon et entendirent que cil
10 d’Arde et de le Planke s’estoient rendu, si furent
tout esbahi et entrèrent en trettiés devers ces François.
Finablement il rendirent le chastiel, salve leur
vies et le leur, et deurent estre conduit jusques à
Calais, ensi qu’il furent, et li François prisent le
15 possession de Bavelinghehem, qui s’en tinrent tout
joiant.
En apriès, on vint devant un autre petit fort que on
appelle le Haie, mais on trouva que li Englès s’en
estoient parti et avoient bouté le feu ens. Adont s’en
20 vint li dus de Bourgongne, et en se compagnie tout
chil baron dessus nommé, et leurs routes, devant
Oudruich, un biau chastiel et fort, douquel troi
escuier englès, que on dist les trois frères de Maulevrier,
estoient chapitain et gardiien, et avoient
25 avoecques yaus de bons compagnons. Quant li dus
de Bourgongne et ses gens furent venu jusques à là,
il l’environnèrent, et leur fu demandé à chiaus dou
fort se il se renderoient, et que cil d’Arde et de
Bavelinghehem estoient rendu. Il respondirent que il
30 n’en faisoient compte et qu’il ne savoient riens de
cela et que point ne se renderoient ensi. Quant on
oy ceste response, adont se logièrent toutes manières
[249] de gens, ce fu par un merkedi, et le joedi toute jour
on regarda comment on les poroit assallir.
Cilz chastiaus de Oudruich siet sus une mote, environnés
de fossés plains d’aigue bien parfons, qui
5 n’estoient mies legier à passer; mais li Breton s’afioient
que bien les passeroient. Adont fist li dus de
Bourgongne drecier ses canons et traire ne sçai cinc
ou sis quariaus pour plus effraer chiaus de dedens.
Si en y eut de ces quariaus qui, par force de trait,
10 passèrent oultre les murs et les pertruisièrent. Quant
cil dou chastiel veirent la forte artellerie que li dus
avoit, si se doutèrent plus que devant, mais toutdis
jusques au dimence fisent il grant samblant d’yaus
tenir et deffendre.
15 Entrues ordonnèrent li François, et avoient ja ordené
toute lor besongne pour avoir l’avantage d’yaus
assallir, grant fuison de bois, de mairiens, de velourdes
et d’estrain pour raemplir les fossés, et
estoient ja les livrées parties pour aler assallir et
20 delivrées, ensi que usages est en telz besongnes, et savoit
cescuns quel cose il devoit faire, et ja jettoient li
kanon, dont il y avoit jusques à set, quariaus de deus
cens de pesant, qui pertruisoient les murs, ne riens
ne duroit devant yaus, quant li troi frère de Maulevrier
25 se misent en trettiet envers le duc, et m’est avis
qu’il rendirent la forterèce, salves leurs vies et le leur,
et furent conduit des gens le duch de Bourgongne
jusques à Calais.