qui legal estoient, travilloient fort que uns
respis fust pris et acordés entre le duch d’Ango et le
duch de Lancastre, et esploitièrent tant que li dus de
5 Lancastre envoia quatre de ses chevaliers à Pieregorch,
pour parler au duc d’Ango et au connestable et à leur
conseil. Chil chevalier furent li sires d’Aubeterre, li
Chanonnes de Robertsart, messires Guillaumes Helmen
et messires Thumas Douville. Si furent chil quatre
10 chevalier recheu, avoech les trettieurs dou duch
d’Ango, moult douchement, et rendoit li connestables
de France [grant painne] à che que unes triewes fuissent
prises entre ces parties. Tant fu parlementé,
pourtrettié et alé de l’un à l’autre, que unes triewes
15 furent prises à durer jusques au daarrain jour d’aoust,
et cuidièrent adont li Englès, dont il furent decheu,
que la journée de Montsach deuist estre enclose en
le triewe.
§ 752. Quant ceste triewe fu acordée par l’ayde et
20 pourcach des legaus dessus nommés, li dus de Lancastre
et li dus de Bretagne s’ordonnèrent à partir et
retourner en Engleterre, car il avoient ja esté priès
d’un an hors, et ossi toutes leurs gens le desiroient.
Et se tiroit li dus de Bretagne que il peuist avoir une
25 armée à par lui pour ariver en Bretagne et conforter
aucunes forterèces qui se tenoient en son non, et
lever le siège de Becheriel; car moult desiroit à oïr
nouvelles de sa femme, que il avoit laissiet ou chastiel
d’Auroy en le garde de monsigneur Jehan Augustin,
30 siques ces coses aidièrent moult à ce que li dus
de Lancastre se parti. Si institua et ordonna, à son
[177] departement, à estre grans seneschaus de Bourdiaus
et de Bourdelois, monsigneur Thumas de Felleton,
et pria et requist as barons [de] Gascongne, qui pour
li se tenoient, que il vosissent obeïr à lui comme à
5 son lieutenant, et telement et si diligamment consillier
que il n’i euissent point de blasme, ne ils point de
damage. Il li eurent tout en couvent de bonne volenté,
et sus cel estat se departi, et toute sa route,
et s’en retournèrent en Engleterre. De ce departement
10 ne furent mies courouchié li dus d’Ango, li
connestables ne li signeur de France, qui à Pieregorch
se tenoient; car leur intention de le journée de
Montsach en fu grandement embellie.
Or parl[er]ons un petit dou siège de Becheriel, qui
15 s’estoit tenus un an et plus, sans chiaus de le garnison
estre noient rafreschi ne aidié; car il estoient si
priès gardé de tous costés que riens ne lor pooit venir,
et se ne lor apparoit confors de nulle partie. Quant
il veirent que leurs pourveances commençoient ja à
20 afoiblir et que longement ne pooient demorer en cel
estat, il s’avisèrent qu’il tretteroient un respit devers
ces signeurs de France et de Normendie, qui là tenoient
le siège, que, se il n’estoient conforté de gens
fors assés pour combatre les François dedens le jour
25 de le Toussains, il renderoient le forterèce. Si envoiièrent
un hiraut promouvoir ce trettié. Li mareschaus
de Blainville et li signeur qui là estoient, respondirent
à ce commenchement que nuls [traictiés]
n’apertenoit à yaus à donner ne à oïr, sans le sceu
30 dou roy de France, mais volentiers il envoieroient
devers lui et li segnefieroient tout cel estat. Li hiraus
raporta ceste response as chapitainnes de Becheriel,
[178] monsigneur Jehan Appert et monsigneur Jehan de
Cornuaille: si leur plaisi bien ceste response et ossi
que il envoiassent hasteement devers le roy de France.
Finablement il y envoiièrent, et rescrisi li rois à ses
5 mareschaus, monsigneur Loeis de Sausoirre et monsigneur
de Blainville, et les barons qui là estoient,
que de toutes compositions il en fesissent à leur
ordenance, et qu’il les tenoit et tenroit à bonnes.
Dont fu perseverés li trettiés devant pourparlés et
10 acordés, et donnés respis à chiaus dedens, et chil
dedens à chiaus dehors, à durer jusques à le Toussains.
Et, se là en dedens li un[s] des filz le roy d’Engleterre
ou li dus de Bretagne ne venoient si fort que
pour lever le siège, il devoient rendre le chastiel de
15 Becheriel as François, et de che livroient il bons
ostages, chevaliers et escuiers, tant que li signeur de
France et de Normendie, qui là se tenoient, s’en
contentèrent bien. Ensi demora li chastiaus de Becheriel
en composition, et segnefiièrent tout leur
20 estat li doi chevalier qui dedens estoient, au plus
tost qu’il peurent, au roy d’Engleterre et au duch de
Bretagne, et ossi as contes et as barons d’Engleterre.
Si sambla as Englès que il avoient journée [encores]
assés: si le misent en noncaloir, excepté li dus de
25 Bretagne, à qui il touchoit plus que à nul des aultres,
car li chastiaus se rendoit de lui et de son
hiretage.
§ 753. Or revenons à le journée de Montsach. Voirs
est que quant la moiienne d’aoust deubt approchier,
30 li dus d’Ango s’en vint devant le ville de Montsach,
et là se loga et fist logier ses gens par grande et
[179] bonne ordenance, et avoit en devant priiés et mandés
gens de tous costés, chevalier[s] et escuiers, efforciement.
Avoech tout che li rois de France y envoia
grant gent d’armes, et me fu recordé que trois jours
5 devant la moiienne d’aoust et trois jours apriès, il y
eut bien quinse mil hommes d’armes, chevaliers et
escuiers, et bien trente mil d’autres gens. Nulz ne se
comparut, car il n’i avoit nul grant chief ou pays,
excepté monsigneur Thumas de Felleton, qui fu trop
10 grandement esmervilliés de celle journée, et le debati
longement et par pluiseurs raisons. Et vint en l’ost,
quant la moiienne d’aoust fu passée et la journée inspirée,
parler moult aviseement au duch d’Ango et au
connestable sus assegurances, et leur remoustra bien
15 et sagement que li dus de Lancastre et li dus de Bretagne
avoient donné le respit par mi che que la journée
de Montsach devoit estre ens enclose, mès on li
prouva tout le contraire; car, à verité dire, il y eut
trop peu parlé pour les Englès, car li trettiés de le
20 composition ne faisoit point de mention de Montsach.
Si couvint monsigneur Thumas de Felleton,
volsist ou non, retourner à Bourdiaus et souffrir [ceste
cose] à laiier passer. Ensi vint en ce temps de ces
arrierefiés. Li contes de Fois entra ou service et en
25 l’obeïssance dou roy de France, et tout li baron et li
prelat, qui dedens estoient; et en prist li dus d’Ango
les fois et les hommages; et quant il s’en senti bien
au dessus, il renvoia les ostages qu’il tenoit en Pieregorch
au conte de Fois, et puis s’en retourna à Toulouse,
30 quant il eut pris le saisine et possession de le
ville et dou chastiel de Montsach, que moult recommenda
en coer, et le fist de puis remparer et rapareillier,
[180] et dist que de Montsach il feroit sa cambre et
son gardecorps.
§ 754. Tantost apriès le revenue de Montsach à
Thoulouse, et que li dus d’Ango et li baron, qui
5 avoecques lui estoient, s’i furent un petit reposet et
rafreschi, li dis dus d’Ango remist une aultre chevaucie
sus de ces propres gens qu’il avoit tenu toute le
saison, et dist qu’il vorroit chevaucier vers le Riole et
vers Auberoce, car là estoit encores uns grans pays à
10 reconquerre, qui ne desiroit aultre cose. Si se departi
de Thoulouse le XVIIe jour de septembre, l’an de
grasce mil trois cens settante et quatre, ossi estoffeement
ou plus que quant il fu en le Haute Gascongne,
et estoient avoecques lui par manière de service li
15 abbes de Saint Silvier, li viscontes de Chastielbon, li
sires de Chastiel Nuef, li sires de l’Escut et li sires de
Marsen, et fisent tant par leurs journées qu’il vinrent
devant le Riole. Tous li pays trambloit devant. Chil de
le Riole, qui ne desiroient aultre cose qu’il fuissent
20 françois, se ouvrirent tantost et se misent en l’obeïssance
dou roy de France. Ossi fisent cil de Langon,
de Saint Malkaire, de Condon, de Saint Basille, de
Prudaire, de Mautlyon, de Dion et de Sebillach, et
bien quarante villes fremées que fors chastiaus, qui
25 à point de fait se tournèrent, et la daarrainne ville ce
fu Auberoce; ne riens ne se tenoit ne duroit en celle
saison devant les François, et legière cose estoit à
faire, car il desiroient à yaus rendre, et se ne leur
aloit nuls au devant.
30 En ce temps que ces chevaucies se faisoient, estoient
en le marche de Pikardie revenu li doi trettieur legal
[181] et se tenoient à Saint Omer, et avoient leur messages
alans et venans en Engleterre devers le roi et son
conseil, et ossi à Paris devers le roy de France, pour
impetrer un bon respit, et en ce respit durant c’estoit
5 leur entention qu’il metteroient toutes parties en
acord. Et, à ce que j’entendi adont, il estoient volentiers
oy dou roy d’Engleterre et de son conseil, car
il veoient que par toutes les metes et limitations [où]
il tenoient terres, villes, chastiaus et pays se perdoient
10 à peu de fait pour yaus, et se n’i savoient [comment]
donner conseil ne comment remediier. Et par especial
trop fort desplaisoit au roy d’Engleterre en
coer de che que li dus de Bretagne avoit ensi et à
petite ocquison perdu son hiretage pour l’amour
15 de lui. Si travillièrent tant chil doi legal que li rois
d’Engleterre acorda que ses filz li dus de Lancastre
paseroit mer et venroit à Calais pour oïr et savoir
plainnement quel cose li François voloient dire. Ossi
li rois de France acorda et seela que ses frères, li dus
20 d’Ango, venroit contre lui à Saint Omer, et par le
moiien des discrètes et venerables personnes l’archevesque
de Ravane et l’evesque de Carpentras, il se
lairoient gouvrener et consillier, siques, si tretost que
li dus d’Ango et li baron de France et de Bretagne
25 eurent achievé ceste daarrainne chevaucie devant
ditte, il furent quoiteusement remandé dou roy de
France et escript que tantost et sans delay il retournaissent
en France, et qu’il avoit accordé son frère
à estre contre celle Toussains à Saint Omer, car li dus
30 de Lancastre devoit estre à Calais; et ossi il touchoit
grandement as barons de Bretagne pour le fait de
Becheriel. Li dus d’Ango, li connestables, li sires de
[182] Cliçon et li aultre se departirent de Roerge au plus
tost qu’il peurent, les lettres dou roy veues et oyes,
sans tourner à Thoulouse, et donnèrent congiet toutes
manières de gens d’armes de lontainnes marces,
5 et ne retint avoecques lui li dus fors les Bretons; si
s’en retourna en France, où il fu grandement festés
et conjoys, et toute sa compagnie, dou roy et de
tout son conseil.
§ 755. En ce temps estoient les marces de Pikardie
10 trop bien garnies de bonnes gens d’armes, car messires
Hues de Chastillon, mestres des arbalestriers,
qui nouvellement estoit retournés d’Engleterre, se tenoit
en garnison à Abbeville atout grant fuison de
gens d’armes et tous bons compagnons, et desiroit
15 grandement [de soy contrevengier] pour ses contraires
et desplaisirs que on li avoit fais en Engleterre
nouvellement; car, ensi que dit est en ceste hystore,
il fu pris au dehors d’Abbeville par embusche de monsigneur
Nicole de Louvaing qui ne le voloit mettre
20 a finance, mais il trouva voie et tour par le pourcach
de ma dame sa femme, comment il fu delivrés
par l’ayde d’un maronnier de l’Escluse en Flandres,
qui se mist en l’aventure de li aler querre en le marce
de Northombreland, et fist tant toutes fois qu’il le ramena
25 en Flandres. Je m’en passerai assés briefment,
car la matère en seroit trop longe à demener. Mais,
quant il fu revenus, on li rendi son office, ensi que
devant, de estre nommés monsigneur le Mestre. Si
se tenoit en le bonne ville d’Abbeville, et chevauçoit
30 à le fois ens et hors, ensi que le mieulz li plaisoit.
De Dieppe sus mer estoit chapitainne messires
[183] Henris des Isles, uns moult appers chevaliers; de Boulongne,
messires Jehans de Lonchvillers; de Moustruel,
messires Guillaumes de Nielle; de Rue, li chastellains
de Biauvais; et toutes ces garnisons de là
5 environ françoises estoient très bien pourveues de
bones gens d’armes, et bien besongnoit, car li Englès
estoient ossi fort sus [le marce]. Pour ce temps estoit
chapitains de Calais messires Jehans de Burlé, et ses
lieutenans, messires Gautiers d’Evrues; de Ghines
10 messires Jehans de Harleston, et d’Arde, li sires de
Gommegnies.
Or avint que messires Gautiers d’Evrues, messires
Jehans de Harleston et li sires de Gommegnies furent
en parlement et en conseil ensamble de chevaucier,
15 et l’acordèrent l’un à l’autre, et fisent leur assamblée
et leur amas dedens le bastide d’Arde, et s’en
partirent au point dou jour bien largement huit vint
lances, et chevaucièrent viers Boulongne. Che propre
jour au matin, estoit partis de Boulogne messires
20 Jehans de Lonchvillers à soissante lances, et avoit
chevauciet viers Calais pour trouver aucune aventure.
Ensi que tout le pas il s’en retournoit, et pooit estre
environt deus liewes priès de Boulongne, il encontra
sus son chemin le signeur de Gommegnies et se route.
25 Sitos que li Englès les perchurent, il furent moult
resjoy, et escriièrent leur cri, et ferirent chevaus des
esporons, et se boutèrent entre yaus, et les espardirent
et en ruèrent jus jusques à quatorse qu’il retinrent
pour prisonniers. Li aultre se sauvèrent par leurs
30 bons coursiers et par l’avantage qu’il prisent, et rentrèrent
tout à point en le ville de Boulongne. Si furent
il cachiet jusques as barrières. Apriès celle cache,
[184] li Englès se recueillièrent et se misent au chemin pour
revenir vers Arde, par une adrèce que on dist ens ou
pays l’Eveline et tout droit devers Alekine, un biau
vert chemin.
5 Ce propre jour avoit fait sa moustre messires Hues
de Chastillon, que on dist monsigneur le Mestre; et
avoit avoecques lui toutes ces chapitainnes de là
environ, et estoient bien quatre cens lances. Li jones
contes de Saint Pol, messires Galerans, estoit nouvellement
10 revenus de sa terre de Loerainne, et
n’avoit mies à Saint Pol sejourné trois jours, quant
par devotion il s’estoit partis pour aler en pelerinage
à Nostre Dame de Boulongne. Si oy [dire] sus son
chemin que monsigneur le Mestre et chil François
15 chevauçoient; se li vint en avis que ce li seroit
blasmes et virgongne, puis que il savoit leurs gens
sus le pays qui chevauçoient, se il ne [se] mettoit en
leur compagnie, et n’i volt trouver nulle excusance,
ensi que uns jones chevaliers qui se desire à avancier
20 et qui quiert les armes. Et s’en vint ce propre jour
au matin avoech monsigneur [Hue] de Chasteillon et
les aultres compagnons, qui furent tout resjoy de sa
venue. Si chevaucièrent liement ensamble celle matinée
viers Arde, qui riens ne savoient des Englès
25 ne li Englès d’yaus, et cuidoient li François que li
Englès fuissent en Arde, et vinrent jusques à là. Et
fisent leur moustre et leur coursée devant les barrières;
et, quant il eurent là esté une espasse, il s’en
retournèrent et prisent le chemin devers Likes et devers
30 Tournehen.
§ 756. Si tretost que li François se furent parti de
[185] devant Arde et mis au retour en chevauçant moult
bellement, uns Englès issi de le ville d’Arde et se mist
à voie couvertement à l’aventure, pour savoir se jamais
il trouveroit leurs gens pour recorder ces riches
5 novelles. Et tant ala et tant vint de lonch et de travers,
que sus son chemin d’aventure il trouva le signeur
de Gommegnies, monsigneur Gautier d’Evrues
et monsigneur Jehan de Harleston. Si s’arresta à euls
et yaus à lui, et leur [compta] comment li François
10 chevauçoient et avoient fait leur moustre devant Arde.
«Et quel chemin tiennent il?» dist li chevaliers.--«Par
ma foi, mi signeur, il prisent le chemin pour
aler vers Likes; car encores, depuis que je me fui
partis, je les ay veus sus le mont de Tournehen, et
15 croi qu’il ne sont pas lonch de chi. Tirés sus destre
en costiant Likes et Tournehen, je espoir que vous
les trouverés, car il chevaucent tout le pas.» Adont
recueillièrent cil troi chevalier toutes leurs gens et
remisent ensamble, et chevaucièrent tout le pas, le
20 banière dou signeur de Gommegnies tout devant et
les deux pennons des deus aultres chevaliers dalés.
Ensi que li François eurent passé Tournehen, et
qu’il tiroient à aler viers Likes, il oïrent nouvelles de
chiaus dou pays et furent segnefiiet que li Englès
25 chevauçoient et estoient hors d’Arde. Si en furent
trop malement joiant, et disent qu’il ne demandoient
ne queroient aultre cose, et faisoient trop durement
grant enqueste où il en poroient oïr nouvelles, car il
faisoient doubte que il ne les perdesissent; et furent
30 sus un estat une espasse, que il se departiroient en
deus chevaucies pour yaus trouver plus prestement,
et puis brisièrent ce pourpos et disent, tout consideret,
[186] que il valoit mieulz que il chevauçassent tout
ensamble. Si chevaucièrent tout ensamble baudement,
barrières et pennons ventelant, car il faisoit
bel et joli, et trop estoit courouciés li contes de Saint
5 Pol qu’il n’avoit là tout son arroi et especialment sa
banière, car il l’euist boutée hors, et fretilloit telement
de joie, qu’il sambloit qu’il n’i deuist ja à
temps venir. Et passèrent oultre l’abbeye de Likes et
prisent droitement le chemin que li Englès tenoient.
10 Si vinrent à un bosket deseure Likes, et là s’arrestèrent
et rechainglèrent leurs chevaus, et fisent en che
dit bosket une embusche de trois cens lances, des
quelz messires Hues de Chastillon estoit chiés, et fu
ordonnés li contes de Saint Pol à courir, et cent
15 lances, chevaliers et escuiers, avoecques lui. Assés
priès de là, au lonch d’une haie, estoient descendu
li Englès, et avoient rechenglé leurs chevaus, et fu
ordonnés messires Jehans de Harleston à courir à
tout quinse lances pour ouvrir l’embusche des François;
20 et se parti avoecques se route, et l’avoient li
sires de Gommegnies et messires Gautiers d’Evrues,
au departement, bien avisé que, se il venoit sus les
coureurs des François, que il se fesist cachier, et de
che se tenoit il tous enfourmés. Ensi chevauça messires
25 Jehans de Harleston et vint sus le conte de Saint
Pol et se route qui estoient tout bien monté. Sitos
que li Englès furent venu jusques à yaus, il fisent leur
moustre, et tantost se misent au retour pour revenir
à leurs compagnons, qui les attendoient au lonch de
30 le haie en très bonne ordenance [et tout à piet], leurs
archiers pardevant yaus. Quant li contes de Saint
Pol les vei fuir, il fu un petit trop aigres d’yaus
[187] poursievir, et feri cheval des esporons, la lance ou poing,
et dist: «Avant, avant! il ne nous poeent escaper.»
Lors veissiés desrouter ces François et mettre en
cache apriès ces Englès, et les cachièrent jusques au
5 pas de le haie. Quant li Englès furent là venu, il
s’arrestèrent, et ossi fisent li contes de Saint Pol et se
route, car il furent recueilliet de ces gens d’armes et
de ces archiers, qui commenchièrent à traire saiettes
à effort et à navrer chevaus et abatre chevaliers et
10 escuiers. Là eut un petit de bon estour, mais tantost
il fu passés; car li contes de Saint Pol ne chil qui
avoecques lui estoient, n’eurent point de durée à ces
Englès. Si fu li dis contes pris d’un escuier de la
ducé de Guerles, et en celle route li sires de Pois, li
15 sires de Clari, messires Guillaumes de Nielle, messires
Charles de Chastillon, messires Lyonniaus d’Arainnes,
li sires de Cipoi, chastellain de Biauvais, messires
Henris des Isles, et Jehans, ses frères, messires Gauwiné[s]
de Bailluel et plus de soissante bons prisonniers,
20 chevaliers et escuiers.
§ 757. Droitement sus le point de celle desconfiture,
evous venir à frapant monsigneur Hue de Chastillon
et se banière, et estoient bien trois cens lances,
et chevauchièrent jusques au pas de le haie, où li
25 autre s’estoient combatu, et encor en y avoit qui se
combatoient. Quant li sires de Chastillon vei le
manière que li contes de Saint Pol et se route estoient
ruet jus, si n’eut mies desir ne volenté d’arrester,
mais feri cheval des esporons, et se parti, et se banière.
30 Li aultre, par droit d’armes, n’eurent point de
blasme se il le sievirent, quant c’estoit leurs sires et
[188] leurs chapitains. Ensi se departirent là trois cens
hommes tous bien montés et tailliés, se li hardemens
fust en yaus, de faire une bonne besongne et de
reskeure le journée, et le jone conte de Saint Pol, au
5 quel ceste aventure fu moult dure, et à tous les bons
chevaliers et escuiers qui avoecques lui furent pris.
Sachiés bien que au commenchement, quant li
Englès veirent venir sus yaus celle grosse route, tous
bien montés et appareilliés de faire un grant fait, il
10 ne furent mies bien à segur de leurs prisonniers ne
d’yaus meismes; mais, quant il les veirent partir et
moustrer les talons, il furent grandement reconforté
et n’eurent nulle volenté adont de cachier chiaus qui
fuioient, mais montèrent as chevaus et fisent monter
15 leurs prisonniers, et tantost fu nuis. Si retournèrent
ce soir en le garnison d’Arde, et se tinrent tout aise
et tout joiant de che qu’il eurent. Che propre soir
après souper, acata li sires de Gommegnies le conte
de Saint Pol à son mestre qui pris l’avoit, et l’en fist
20 fin de dis mil frans. Ensi fu li contes de Saint Pol
prisonniers au signeur de Gommegnies. A l’endemain,
cascuns des chapitainnes retourna où il devoit
aler, messires Jehans de Harleston à Ghines, et messires
Gautiers d’Evrues à Calais, et leurs gens, et en
25 menèrent leurs prisonniers et tout leur butin.
Ces nouvelles s’espardirent jusques en Engleterre,
et vinrent au roy, et li fu dit que ses chevaliers, li
sires de Gommegnies, avoit eu sus un jour rencontre
et bataille as François, et si bien s’i estoit portés que
30 ilz et si compagnon avoient desconfi les François, et
tenoit le conte de Saint Pol à prisonnier. De ces
nouvelles fu grandement resjoïs li rois d’Engleterre
[189] et tint ce fait à grant proèche, et manda par ses
lettres et par un sien escuier au signeur de Gommegnies,
que il le venist veoir en Engleterre et li amenast
son prisonnier. Li sires de Gommegnies obéï,
5 che fu raisons, et recarga Arde à ses compagnons,
et puis s’en parti, le conte de Saint Pol en se compagnie.
Si vinrent à Calais, et là se tinrent tant
qu’il eurent vent pour passer oultre, et, quant il
l’eurent, il entrèrent en un passagier. Si arrivèrent,
10 ce propre jour qu’il montèrent, à Douvres. De puis
esploitièrent il tant qu’il vinrent à Windesore, où li
rois se tenoit, qui rechut le signeur de Gommegnies
en grant chierté. Tantos li sires de Gommegnies,
quant il li eut fait la reverense, ensi que on doit faire
15 à un roy, li presenta et li donna le conte de Saint Pol,
pour tant qu’il sentoit bien que li rois le desiroit à
avoir pour deus raisons. Li une estoit que li rois n’avoit
point amet son signeur de père le conte Gui,
pour tant que sans congiet il s’estoit partis d’Engleterre
20 et que très grant painne avoit mis à la guerre
renouveler; l’autre, que il en pensoit bien à ravoir
ce vaillant chevalier et ce grant chapitainne de gens
d’armes monsigneur le captal de Beus, qui gisoit en
prison en le tour dou Temple à Paris, ens es dangiers
25 dou roy de France. Si remercia li rois liement
le signeur de Gommegnies de ce don et de ce present,
et li fist tantost delivrer vint mil frans. Ensi
demora li jones contes de Saint Pol en prison courtoise
devers le roy d’Engleterre, recreus sus sa foy
30 d’aler et de venir par mi le chastiel de Windesore et
non issir de le porte sans le congiet de ses gardes; et
li sires de Gommegnies retourna à Arde entre ses
[190] compagnons. Si paia bien aise de l’argent le roy
d’Engleterre l’escuier de Guerles, qui pris avoit le
signeur de Lini, conte de Saint Pol.
§ 758. Tantost apriès ceste aventure, furent les
5 triewes prises et acordées entre le roy de France et
le roy d’Engleterre, et ne s’estendoient, à ce premier,
fors tant seulement entre Calais et le rivière
de Somme, et furent ensi prises et données par avis
pour les signeurs de France chevaucier segurement
10 en le marce, où li parlement devoient estre, car toute
celle saison il n’en tinrent nulles ens es lointaines
marces, et par especial en Bretagne et en Normendie.
Si vint li dus d’Ango à Saint Omer en grant arroy, et
cil doy legal trettieur avoecques lui, et n’i vint mies
15 si simplement qu’il n’euist en se compagnie plus de
mil lances de Bretons, dont li connestables de France,
li sires de Cliçon, li viscontes de Rohem, li sires de
Laval, li sires de Biaumanoir et li sires de Rocefort
estoient chief. Si se tenoient ces gens d’armes pour
20 les embusches ou plat pays environ Bailluel et le
Crois en Flandres, et prendoient leurs sauls et leurs
gages, et paioient tout ce qu’il prendoient, sans riens
grever le pays, mais il se tenoient là en celle instance
qu’il ne s’asseuroient mies trop parfaitement en es
25 Englès.