QUANDO Typographiam illam Parisiensem, quæ Sanctitati tuæ Gallias ad
tempus incolenti feliciter inservit, visitare dignaris, typi moventur ut
aliquid in laudem tuam exhibeant; præla fervent ut mansuris illud
signent figuris, atque ita seræ posteritati commendent. Typographus, tam
suo quàm opificum suorum nomine, subitum istud industriæ communis opus
verendo admodùm Hospiti gestit offerre. Hasce lineolas, sinceri in
Summum Pontificem obsequii testes, ac pii erga Christi Vicarium
affectûs indices, typis mandaverunt juvenes audiendi pariter et loquendi
usu destituti. Sed physicas facultates, quas parca nimis natura
negaverat, ipsis postea tribuit vir quidam clarissimus, et nativitatis
defectus artis suæ potentiâ supplevit. In officina nostra prodigiorum
semper feraci, quod opifices auribus percipere non valent, id oculis
apprehendunt; et quod ore non possunt dicere, id digitis eloquuntur.
Hinc est, quod litterarum ministerio, et totius corporis habitu ad
venerationem composito, Apostolicam Benedictionem tuam suppliciter
exposcunt.
_Traduction_: