"Pen mandy a waver gudlo apa o chone?"
Avail miri deari. Adre o puro chirus butidosta manushia jivvede
kushti-bakeno 'dre o chone, sar chichi ta kair awer ta rikker ap o yag so
kerela o dud. Awer, amen i foki jivdas buti wafodo muleno manush, kon
dusherdas te lias witchaben atut sar i waveri deari manushia, te yuv
kairedas lis sa's ta shikker lende sar adrom, te chivdas len avri o
chone. Te kenna o sig o i foki shan jillo, yuv pendas: "Kenna akovi
dinneli juckalis shan jillo, me te vel jiv mashni te kushto, sar
akonyus." Awer pash o bitto, o yag ankairdas ta hatch alay, te akovo
geero latchdas se yuv ne kamdas ta hatch adre o ratti te merav shillino,
yuv sosti ja sarja pa kosht. Te kanna i waveri foki shanas adoi, yan ne
kerden o rikkaben te wadderin i kashta adre o divvusko chirus, awer kenna
asti lel lis sar apre sustis pikkia, sar i ratti, te sar o divvus. Sa i
foki akai apre o chollo-tem dikena adovo manush keti divvus kenna, sar
pordo o koshter te bittered, te muserd te gumeri, te guberin keti leskro
noko kokero, te kunerin akonyus pash lestis yag. Te i chori mushia te
yuv badderedas adrom, yul [yan] jassed sar atut te trustal o hev akai, te
adoi, te hatchede up buti pa lender kokeros; te adovi shan i starya, te
chirkia, te bitti dudapen tu dikessa sarakai.
"Se adovo sar tacho?" Akovi se kumi te me jinova. Awer kanna sa tu
penessa me astis dikk o manush dre o chone savo rikkela kasht apre lestes
dumo, yuv sosti keravit ta chiv adre o yag, te yuv ne tevel dukker lestes
kokero ta kair adovo te yuv sus rumado or lias palyor, sa lis se kammaben
adosta o mush chingerd lestis palya te nassered lende sar anduro. Tacho.