"Miro koko, pen mandy a rinkeno gudlo?"
Avali miri chavi. Me 'tvel pen tute dui te shyan trin, vonka tute
'atches sar pukeno. Shun amengi. Yeckorus adre o Lavines tem sos a boro
chovihan, navdo Merlinos. Gusvero mush sos Merlinos, buti seeri covva
yuv asti kair. Jindas yuv ta pur yeck jivnipen adre o waver, saster adre
o rupp, te o rupp adre sonakai. Fino covva sos adovo te sos miro. Te
longoduro fon leste jivdes a bori chovihani, Trinali sos lakis nav.
Boridiri chovihani sos Trinali, buti manushe seerdas yoi, buti ryor
purdas yoi adre mylia te balor, te ne kesserdas yeck haura pa sar lender
dush.
Yeck divvus Merlinos lias lester chovihaneskro ran te jas aduro ta
latcher i chovihani te pessur laki drovan pa sar lakis wafropen. Te pa
adovo tacho divvus i rani Trinali shundas sa Merlinos boro ruslo sorelo
chovihan se, te pendas, "Sossi ajafra mush? Me dukkerava leste or yuv
tevel mer mande, s'up mi o beng! me shom te seer leste. Mukkamen dikk
savo lela kumi shunaben, te savo se o jinescrodiro?" Te adoi o Merlinos
jas apre o dromus, sarodivvus akonyo, sarja adre o kamescro dud, te
Trinali jas adre o wesh sarja adre o ratinus, o tam, o kalopen, o shure,
denne yoi sos chovihani. Kennasig, yan latcherde yeckawaver, awer
Merlinos ne jindas yoi sos Trinali, te Trinali ne jindas adovo manush se
Merlinos. Te yuv sos buti kamelo ke laki, te yoi apopli; kennasig yandui
ankairde ta kam yeckawaver butidiro. Vonka yeck jinella adovo te o waver
jinella lis, kek boro chirus tvel i dui sosti jinavit. Merlinos te
Trinali pende "me kamava tute," sig ketenes, te chumerde yeckawaver, te
beshde alay rikkerend adre o simno pelashta te rakkerde kushto bak.
Te adenna Merlinos pukkerdas laki, yuv jas ta dusher a buti wafodi
chovihani, te Trinali pendas lesko o simno covva, sa yoi sos ruzno ta
kair o simno keti a boro chovihano. Te i dui ankairede ta manger
yeckawaver ta mukk o covva ja, te yoi te yuv shomas atrash o nasherin
lende pireno te pireni. Awer Merlinos pendas, "Mandy sovahalldom pa o
kam ta pur laki pa sar lakis jivaben adre o waves truppo." Te yoi
ruvvedas te pendas, "Sovahalldas me pa o chone ta pur adovo chovihano
adre a wavero, sim's tute." Denna Merlinos putcherdas, "Sasi lesters
nav?" Yoi pendas, "Merlinos." Yuv rakkeredas palall, "Me shom leste,
sasi tiro nav?" Yoi shelledas avri, "Trinali!"
Kenna vanka chovihanis sovahallan chumeny apre o kam te i choni, yan
sosti keravit or mer. Te denna Merlinos pendas, "Jinesa tu sa ta kair
akovo pennis sar kushto te tacho?" "Kekker miro kamlo pireno," pendas i
chori chovihani sa yoi ruvdas." "Denna me shom kumi jinescro, ne tute,"
pendas Merlinos. "Shukar te kushto covva se akovo, miri romni. Me bevel
pur tute adre mande, te mande adre tute. Te vonka mendui shom romadi
mendui tevel yeck."
Sa yeck mush ta divvus kenna penella yoi siggerdas leste, te awavero pens
yuv siggerdas laki. Ne jinava me miri kameli. Ne dikkdas tu kekker a
dui sherescro haura? Avail! Wusser lis uppar, te vanka lis pellalay
pukk amengy savo rikk se alay. Welsher pendas man adovo. Welsheri
pennena sarja tachopen.