Tu shan miri pireni
Me kamava tute,
Kamlidiri, rinkeni,
Kames mande buti?
Sa o miro kushto gry
Taders miri wardi,--
Sa o boro buno rye
Rikkers lesto stardi.
Sa o bokro dre o char
Hawala adovo,--
Sa i choramengeri
Lels o ryas luvoo,--
Sa o sasto levinor
Kairs amandy matto,--
Sa o yag adre o tan
Kairs o geero tatto,--
Sa i puri Romni chai
Pens o kushto dukkrin,--
Sa i Gorgi dinneli,
Patsers lakis pukkrin,--
Tute taders tiro rom,
Sims o gry, o wardi,
Tute chores o zi adrom
Rikkers sa i stardi.
Tute haws te chores m'ri all,
Tutes dukkered buti
Tu shan miro jivaben
Me t'vel paller tute.
Paller tute sarasa
Pardel puv te pani,
Trinali--o krallisa!
Miri chovihani!