1.
Word's gane to the kitchen,
And word's gane to the ha',
That Marie Hamilton gangs wi' bairn
To the hichest Stewart of a'.
2.
He's courted her in the kitchen,
He's courted her in the ha',
He's courted her in the laigh cellar,
And that was warst of a'.
3.
She's tyed it in her apron
And she's thrown it in the sea;
Says, 'Sink ye, swim ye, bonny wee babe,
You'll ne'er get mair o' me.'
4.
Down then cam the auld queen,
Goud tassels tying her hair:
'O Marie, where's the bonny wee babe
That I heard greet sae sair?'
5.
'There was never a babe intill my room,
As little designs to be;
It was but a touch o' my sair side,
Come o'er my fair bodie.'
6.
'O Marie, put on your robes o' black,
Or else your robes o' brown,
For ye maun gang wi' me the night,
To see fair Edinbro' town.'
7.
'I winna put on my robes o' black,
Nor yet my robes o' brown;
But I'll put on my robes o' white,
To shine through Edinbro' town.'
8.
When she gaed up the Cannogate,
She laugh'd loud laughters three;
But whan she cam down the Cannogate
The tear blinded her ee.
9.
When she gaed up the Parliament stair,
The heel cam aff her shee;
And lang or she cam down again
She was condemn'd to dee.
10.
When she cam down the Cannogate,
The Cannogate sae free,
Many a ladie look'd o'er her window,
Weeping for this ladie.
11.
'Ye need nae weep for me,' she says,
'Ye need nae weep for me;
For had I not slain mine own sweet babe,
This death I wadna dee.
12.
'Bring me a bottle of wine,' she says,
'The best that e'er ye hae,
That I may drink to my weil-wishers,
And they may drink to me.
13.
'Here's a health to the jolly sailors,
That sail upon the main;
Let them never let on to my father and mother
But what I'm coming hame.
14.
'Here's a health to the jolly sailors,
That sail upon the sea;
Let them never let on to my father and mother
That I cam here to dee.
15.
'Oh little did my mother think,
The day she cradled me,
What lands I was to travel through,
What death I was to dee.
16.
'Oh little did my father think,
The day he held up me,
What lands I was to travel through,
What death I was to dee.
17.
'Last night I wash'd the queen's feet,
And gently laid her down;
And a' the thanks I've gotten the nicht
To be hang'd in Edinbro' town!
18.
'Last nicht there was four Maries,
The nicht there'll be but three;
There was Marie Seton, and Marie Beton,
And Marie Carmichael, and me.'