"Nova pictura _interpolare_ vis opus lepidissimum."
—Plaut. _Mostell._ I, III, 105.
INTERPOLES: Mulieres quae se fucis interpolant, ut novae et quasi
puellae videantur.
"Nam istaec veteres, quae se unguentis unctitant, _interpoles,_
Vetulae, edentulae, quae vitia corporis fuco occulunt, Ubi sese sudor
cum unguentis consociavit, illico Itidem olent, quasi quum una multa
jura confundit cocus."
—Plaut. _Mostell._ I, III, 117 sqq.
INTESTABILIS, INTESTATUS: Cui _testes_ avulsi sunt; spado, castratus.
"Semper curato ne sis _intestabilis_: Quod amas, amato _testibus_
praesentibus."
—Plaut. _Curc._ I, I, 30 sq.
"Et si _intestatus_ non abeo, bene agitur pro noxia.—Quid si non
faxis?—Ut vivam semper _intestabilis_."
—Plaut. _Mil._ V, 23 sq.
IONICI MOTUS: Saltatio lascivissima ab _Ionibus_ inventa; prae ceteris
enim famosi erant mollitie et libidinibus. Inde _risus ionicus_ pro
dissolutiore.
"Quis _Ionicus_ aut cinaedicus qui hoc tale facere posset?"
—Plaut. _Stich._ V, VII, 1.
_Motus_ doceri gaudet _ionicos_
Matura virgo, et fingitur artubus
Jam nunc, et incestos amores
De tenero meditatur ungui.
—Hor. _Od._ III, VI, 21 sqq.
IRRUMARE: Os alicujus inire. Vitium senum et emeritorum.
Quid me, Thai, senem subinde dicis?
Nemo est, Thai, senex ad _irrumandum_.
—Mart. IV, L, 1 sq.
"Pronior erat (Tiberius) ad id genus libidinis, et natura et aetate."
—Suet. _in Tiber._ 44.
Vide _Juvenalem_, X, 208, et de _irrumatione_, in _Melle Hieronym._
_Mercurial._ IV, pag. 93.
An, continenter quod sedetis insulsi
Centum, aut ducenti, non putatis ausurum
Me una ducentos _irrumare_ sessores?
—Catull. XXXV, 6 sqq.
_irrumare_ a _ruma_.
ISIS: Fanum ejus quibuscumque pactis et furtis venereis celeberrimum.
Inde praefecta lenonum et meretricum dicebatur.
...Jamque exspectatur in hortis,
Aut apud _Isiacae_ potius sacraria _lenae._
—Juv. VI, 488 sq.
Nec tu Niligeram fieri quod possit ad _Isim_
Quaesieris? nec tu curva theatra time.
—Ovid. _Am._ II, II, 26 sq.
Nuper enim, ut repeto, _fanum Isidis_ et Ganymedem
Pacis, et advectae secreta palatia Matris,
Et Cererem, (nam quo non prostat foemina templo?)
Notior Aufidio moechus scelerare solebas,
Quodque taces, ipsos etiam inclinare maritos.
—Juv. IX, 22 sqq.
ITHYPHALLI: Priapi lignei in honorem Bacchi. In summa hasta positi,
compitis subrigebantur.
"In Liberi honorem patris _ithyphallos_ subrigit Graecia; et
simulacris virilium fascinorum territoria cuncta florescunt."
—Arnob. _adv. Gent._ V.
Arte laboretur, sed truncum forte dolatum
Arboris antiquae numen venerare _Ithyphalli,_
Terribilis membri, medio qui semper in horto
Inguinibus puero, praedoni falce minatur.
—Columell. _de Cultu hort._ V, 31 sqq.
Hinc:
ITHYPHALLICUS: Qui continue arrigit, irritante morbo aut incessabili
uredine; qui satyriasi laborat. Vide Vossium, _Gloss. ling. lat._
JACERE: Verbum nuptum.
"_Jacent_ nunc amatores obligati noctibus totis; et forsitan mutuis
libidinibus attriti, derident solitudinem meam."
—Petron. _Sat._
Mollia quod nivei duro teris ore Galesi
Basia, quod nudo cum Ganymede _jaces_;
Quis negat hoc nimium?
—Mart. XI, XXIII, 1 sqq.
Briseis multum quamvis aversa _jaceret_,
Aeacidae propior levis amicus erat.
—Mart. XI, XLIV, 9 sq.
JECUR: In _jecore_ amoris sedem esse arbitrabantur antiqui, maxime
Platonici.
"Laetitiae affectus in splene, timoris in corde, irae in felle,
_libidinis in jecore_."
—Lactant. VI, 15, _et de Opific. Dei_, 14.
Tempestivius in domo
Pauli, purpureis ales oloribus,
Commissabere Maximi,
Si torrere _jecur_ quaeris idoneum.
—Hor. _Od._ IV, I, 9 sqq.
Quum tibi flagrans amor, et libido,
Quae solet matres furiare equorum,
Saeviet circa _jecur_ ulcerosum,
Non sine questu.
—Hor. _Od._ I, XXV, 13 sqq.
JUGUM: Pro matrimonio, ab hoc antiquissimo ritu quo _jugum_ aratri
sponsis imponebatur, hoc symbolo monitis omnium rerum individuae
societatis. Vide _Serv._, _Isidor._, etc.
"_Juges_ ejusdem _jugi_ pares."
—Fest.
Unde, _conjuges_ pro maritatis; _jugum Veneris_, pro matrimonio, etc.,
et:
JUGUM FERRE: Dicebatur de muliere virum experta. Sic Graecis
νεόζυγος, _nova nupta_, et ἄζυγες γάμον, quae
_nondum maritatae_.
"Jamne ea _fert jugum_?—Tam a me pudica est, quasi soror mea sit;
nisi Si est osculando quippiam impudicior."
—Plaut. _Curcul._ I, I, 50 sqq.
Nondum subacta _ferre jugum_ valet
Cervice; nondum munia comparis
Aequare, nec tauri ruentis
In venerem tolerare pondus.
—Hor. _Od._ V, V, 1 sqq.
JUGA: Cognomen Junonis, tanquam praepositae nuptiis legitimis. Vide
JUGUM.