Quae _dos_ matronae pulcherrima? vita pudica.
—Auson. _Sententiae septem sapientium. Bias._
Saepe in conjugiis fit noxia, si nimia est...dos.
—Auson. _Technopaegnion. de inconnexis_.
DOTATA MULIER VIRUM REGIT.: Adagium Romanorum, hic notandum ad
utilitatem aevi nostri.
"Argentum accepi, dote imperium vendidi."
—Plaut. _Asin._ I, I, 74.
Et etiam apud eumdem, Megadorus, Euclionis gener, post multa dotatae
uxoris incommoda:
"Hae sunt (inquit) atque aliae multae in magnis dotibus
Incommoditates, sumtusque intolerabiles. Nam quae indotata est, ea in
potestate est viri; _Dotatae_ mactant et malo et damno viros."
—Plaut. _Aulul._ III, V; 58 sqq.
Nec _dotata regit virum_
Conjux, nec nitido fidit adultero.
Dos est magna, parentium
Virtus, et metuens alterius viri
Certo foedere castitas.
—Hor. _Od._ III, XXIV, 19 sqq.
DRAUCI: Agentes in paedicatione, ad usum pathicorum. Stabant _drauci_
in balneis et gymnasiis, operam hirsutis vendentes. Plerique fortiter
mentulati.
...Adspicit nihil sursum;
Sed spectat oculis devorantibus _draucos,_
Nec otiosis mentulas videt labris.
—Mart. I, XCVII, 11 sqq.
Harpasto quoque subligata ludit,
Et flavescit haphe, graveisque _draucis_
Halteras facili rotat lacerto.
—Mart. VII, LXVII, 4 sqq.
DUCERE: Verbum nuptiale. Ex ritu, novam nuptam maritus in domum suam
_ducebat_, similitudine raptus Sabinarum. Inde et brevi sermone vir in
connubiis _ducere_ dicebatur, mulier vero _nubere_.
Uxorem quare locupletem _ducere_ nolim
Quaeritis? uxori _nubere_ nolo meae.
Inferior matrona suo sit, Prisce, marito:
Non aliter fiunt foemina virque pares.
—Mart. VIII, XII. 1 sqq.
Uxorem nolo Thelesinam _ducere;_ quare?
Moecha est. Sed pueris dat Thelesina: volo.
—Mart. II, XLIX, 1 sq.
DUCERE PRAEPUTIUM: Masturbari.
Abditus interea latet, et secretus adulter,
Impatiensque morae silet, et _praeputia ducit._
—Juv. VI, 237 sq.
DUCTARE: Puellam sibi ad stuprum comparare; cum illa venerem agere.
"Ut phaleratis dictis _ductas_ me, et meam _ductes_ gratis."
—Terent. _Phorm._
"Quid modi est? _ductando_, amando, numquamne expleri potes?"
—Plaut. _Asin._ I, III, 17.
Eodem sensu intelligenda sunt haec Quintiliani verba, lib. VIII, cap.
III:
"_Ductare exercitus_, et _patrare bellum_ apud Sallustium dicta
sancte et antique, ridentur a nobis, si diis placet."
DUELLUM: Ad veneream militiam translatum.
Tandem progredere, et _duellum_ anhelis
Audax militibus cieto miles:
......
Virgo cypriacis potens sagittis
Illa in lubriculum vocat _duellum._
—Petron. _Phaleuc._ 26 sqq.
Vide MILITARE.
DIONYSIA: Festa in honorem Bacchi, apud Graecos flagitiosissima. Per
noctem enim viri et foeminae, inter vina et epulas, promiscue coibant.
Unde proverbium illud:
Qui Curios simulant, et Bacchanalia vivunt.
—Juv. II, 3.
_Dionysiis_ phallum gestabant, id est ficulna veretra a collo
propendentia; unde _phallagogia_ dicebantur Bacchi sacra, et phallorum
pompa _periphallia_ nuncupabatur. Vid. _Plutarch. in Morali, Herodot.,
Juvenalis annotatores, et Erasm. adag.: Bacceo more_, etc.
DYSEROS: Infelix in amore. Mere graecum, a particula δυς, _aegre_,
et ἔρως, _amor_. Vide _Auson. epigr._ XC.
[TR1] "pertracto" → "pertractato"