"Will ye gae to the Hielands, Lizie Lindsay,
Will ye gae to the Hielands wi' me?
Will ye gae to the Hielands, Lizie Lindsay,
And dine on fresh curds and green whey?"
Then out it spak' Lizie's mither,
An' a gude auld leddy was she:
"Gin ye say sic a word to my daughter,
I'll gar ye be hangit hie!"
"Keep weel your daughter for me, madam;
Keep weel your daughter for me.
I care as leetle for your daughter
As ye can care for me!"
Then out spak' Lizie's ain maiden,
An' a bonnie young lassie was she;
"Now gin I were heir to a kingdom,
Awa' wi' young Donald I'd be."
"O say ye sae to me, Nelly?
And does my Nelly say sae?
Maun I leave my father and mither,
Awa' wi' young Donald to gae?"
And Lizie's ta'en till her her stockings,
And Lizie's taen till her her shoon,
And kilted up her green claithing,
And awa' wi' young Donald she's gane.
The road it was lang and was weary;
The braes they were ill for to climb;
Bonnie Lizie was weary wi' travelling,
A fit further couldna she win.
"O are we near hame yet, dear Donald?
O are we near hame yet, I pray?"
"We're naething near hame, bonnie Lizie,
Nor yet the half o' the way."
Sair, O sair was she sighing,
And the saut tear blindit her e'e:
"Gin this be the pleasures o' luving,
They never will do wi' me!"
"Now haud your tongue, bonnie Lizie;
Ye never sall rue for me;
Gie me but your luve for my ain luve,
It is a' that your tocher will be.
"O haud your tongue, bonnie Lizie,
Altho' that the gait seem lang;
And you's hae the wale o' gude living
When to Kincaussie we gang.
"My father he is an auld shepherd,
My mither she is an auld dey;
And we'll sleep on a bed o' green rashes,
And dine on fresh curds and green whey."
They cam' to a hamely puir cottage;
The auld woman 'gan for to say:
"O ye're welcome hame, Sir Donald,
It's yoursell has been lang away."
"Ye mustna ca' me Sir Donald,
But ca' me young Donald your son;
For I hae a bonnie young leddy
Behind me, that's coming alang.
"Come in, come in, bonnie Lizie,
Come hither, come hither," said he;
"Altho' that our cottage be leetle,
I hope we'll the better agree.
"O mak' us a supper, dear mither,
And mak' it o' curds and green whey;
And mak' us a bed o' green rashes,
And cover it o'er wi' fresh hay."
She's made them a bed o' green rashes,
And covered it o'er wi' fresh hay.
Bonnie Lizie was weary wi' travelling,
And lay till 'twas lang o' the day.
"The sun looks in o'er the hill-head,
An' the laverock is liltin' sae gay;
Get up, get up, bonnie Lizie,
Ye've lain till it's lang o' the day.
"Ye might hae been out at the shealin',
Instead o' sae lang to lie;
And up and helping my mither
To milk her gaits and her kye."
Then sadly spak' out Lizie Lindsay,
She spak' it wi' mony a sigh:
"The leddies o' Edinbro' city
They milk neither gaits nor kye."
"Rise up, rise up, bonnie Lizie,
Rise up and mak' yoursel' fine;
For we maun be at Kincaussie,
Before that the clock strikes nine."
But when they cam' to Kincaussie,
The porter he loudly doth say,
"O ye're welcome hame, Sir Donald;
It's yoursell has been lang away!"
It's doun then cam' his auld mither,
Wi' a' the keys in her han';
Saying, "Tak' ye these, bonnie Lizie,
For a' is at your comman'."
* * * * *