Der gor en Mand mell Grønning-Knold
--vi letter po wor Hat--
hans Mind vil Salling læng behold,
--den letter po si Hat.
Æ Blæst ka flyw, æ Storm ka bus,
det rokker ett den Snejkers Hus,
men letter po _wor_ Hat.--
Han er lidt rynked i æ Bark,
--vi letter po wor Hat--
men inderst ind en hwelle Knark,
--vi letter po ver Hat;
og stil ham mud en Timmerdyng,
da ka do trow, hans Yws ka syng.
--a letter po mi Hat!
Han haader Brændvin som æ Dæwl
--a letter po mi Hat--
og saa do ham handtir en Hæwl,
_do_ letted po di Hat.--
Æ Sommerdaw han haar æ trunt,
ved Vintertid da gor han rundt
og letter po hans Har.
For hwer en Knot, for hwer en Knast,
der stented mud hans Hat,
for hwer den Diel, han haar slaan fast,
vi letter po wor Hat
Wor Tap ska dripp, wor Øl ska skyll!
A trowr saagi hans gammel Møll
no letter po si Hat.
Her staar vi i den Snejkers Stow
og letter po wor Hat,
ja for ham sjel og for hans Frow
vi letter po wor Hat;
for aall de Daw og aall de Or,
der glaadle kam og laangle gor,
vi Letter Po wor Hat.
Okt. 1907.
[Footnote: _bus_, jage hæftig af Sted; _Snejker_, er baade Snedker og
Tømrer; _hwelle_, dygtig; _Timmerdyng_, Tømmerstabel; _Yws_, Økse;
_Hæwl_, Høvl; _trunt_, travlt; _Knot_, Ujævnhed; _stented_, fór imod;
_slaan_, slaaet; _Or_, Aar; _glaadle_, med Glæde.]