Og her kommer _a_ med mi Hywl og mi Kjep
og mi Hej-hej-ha og mi Haah--
Og hwis I vil skink mæ en jenle bette Sep,
saa blywer mi Øwen saa glaad.
Saa skal a fortæl jer en Krumm om mæ sjel
og mi Hej-hej-ha og mi Haah--
hwordan a kam hen aa slaa Tysker ihjæl
og sjel kam saa skamle te Skaad.
--I faromgoddaw drøw a Verden omkring
med mi Hej-hej-ha og mi Haah--
tho a ku jo syssel ved hunder Slavs Ting
--og æ Pigger--de war mæ saa raar!
A klinked dje Grydder, a hwet dem dje Saws
og dje Hej-Hej-ha og dje Haah--
hwor bløw de da mild! A sku hold ved dje Klaws,
og de vidst jo aalle nø Maad.
_A_ smej, og _a_ sang, og a klaared mæ godt
med mi Hej-hej-ha og mi Haah,
og dér var skam jen, a ku gjan ha faat,
og _hun_ war nu ett med de baar!
Men _a_ sku no ett vær Mari hinne Mand
med mi Hej-hej-ha og mi Haah,
for _a_ maatt jo hen aa værg for æ Land,
for den war sgi kommen i Faar.
_Det_ myldred med Tysker, ihwor en so hen,
med mi Hej-hej-ha og dje Haah,
og Tysker war sjalden Menneskens Ven,
saalaant da æ Kuller ska raad.
De dænged wos te med dje Bly ag dje Stjen
og dje Hej-hej-ha og dje Haah--
og øj mæ da rejn den jen af mi Bjen
og ga mæ mi Skrup og mi Skaad.
De toen da fræ mæ her nejen mi Knæ
med dje Hej-hej-ha og dje Haah--
og gav mæ saa jen, de haaj huggen af Træ
--og saa denneher bette Plaad.
Æ Daw de gik ad, og æ Tysker war gan
med dje Hej-hej-ha og dje Haah--
og saa kam _a_ hjem og gywt mæ med Ann
og slo mæ hernied po æ Gaad.
Der sejjer a hejsen og hytter mæ godt
med mi Hej-hej-ha og mi Haah,
og skulter mæ javnle og kikker saa smaat,
nær æ Vind den flywer med æ Blaad.
For no er a gammel og gro i æ Tow,
i mi Hej-hej-ha og mi Haah;--
men en Hywl kan a sløv, og en Hest ka a skow
og legg Ægstol ind i en Spaad.
Naa, no'el a res mæ, og saa'el a go
med mi Hej-hej-ha og mi Haah--
mi Kjep haar a ved mæ, mi Rasp--og mi Skro,
mi Hywl den vinter ved æ Laad.
7/2 1906.
[Footnote: _Hywl_, Hjul; _Sep_, Draabe (om Spiritus); _i faromgoddaw_, i
gamle dage; _hwet_, sleb; _Saws_, Sakse; _Klaws_, Garnfed; _baar_, bare,
fattige; _Kuller_, Kugler; _øj_, ødte; _nejen_, nedenfor; _bitte Plaad_,
Medaljen; _gan_, gaaet; _Gaad_, Bygaden; _hejsen_, ellers; _hytter_,
nærer; _skulter_, skutter; _æ Tow_, Ulden; _en Hywl ka a sløv_, et Hjul
kan jeg forme; _Ægstol_, Ægstaal; _Spaad_, Spade; _Laad_, Lade.]