Der gor en O her vejsterpo
med Fleg omkring og Kwanne, ja;
aak, der war det en Lyst aa go
i Awtensdôg med Nanne, ja!
Æ Suel er nied, men øwer æ Hied
der flywer en Pa Tanne, ja;
æ Gjej han slaar, æ O den gor
med aal mi Sind mud Nanne, ja.
Nys drøw en Æl; no kam en Hwæl
som fræ wor Møllers Swanne, ja;
aak, de er tow, ka sow i Row,
nær a mo tink paa Nanne, ja.
Æ Nætter er no mørk og kold,
æ Vejlo wot og vande, ja,
men a gaar øwer Kjâr og Knold
og vejsterud til Nanne, ja.
Der stor en Lys i Nannes Rud
for mæ og ingen anner, ja,
te ett a gor i Syk derud,
men vinder hjem te Nanne, ja.
Ved Piggerbøen det tit er swær
aa skjell æ Own fræ Kjanne ja,
men det tar a mæ aalle nær,
saalæng a haar mi Nanne, ja.
For gor æ gjemmel ondt hæ godt,
og stige heller strande a,
saa er _hun_ mej i mi Komplot,
mi Dawsens Gled, mi Nanne, ja!
10/8 1902.
[Footnote: _Fleg_, bredbladet Græsart; _Kwanne_, en Skjærmplante;
_Awtensdôg_, Aftendug; _Tanne_, Terner; _Gjej_, Gjedden; _æ O_, Aaen;
_Æl_, Byge; _Hwæl_, Skrig; _Row_, Ro; _wot og wande_, vaadt og vandet;
_Kjâr_, Kjær (Flertal); _Syk_, Synk; _skjell_, skille; _æ Own_, Avnerne;
_Kjanne_, Kjærner; _gjemmel_, gjennem.]