L'an de grace mil trois cent soixante-huit, le dimenche jour de
Quasimodo seiziesme jour d'avril, Pasques furent celuy an le neuviesme
jour dudit mois, messire Lyonnel, duc de Clarence, second fils du roy
d'Angleterre, entra à Paris et venoit d'Angleterre; et aloit à Milan
espouser la fille messire Galiache, l'un des seigneurs de Milan; et
alèrent jusques à Saint-Denys en France encontre ledit Lyonnel
monseigneur Jehan, duc de Berry, et messire Phelippe, duc de Bourgoigne,
frères germains du roy de France. Et le menèrent descendre droit au
Louvre où ledit roy estoit, et laiens fu receu dudit roy moult
honnorablement. Et ot laiens sa chambre moult bien parée et aournée; et
disna celuy jour et souppa au chastel du Louvre avecques le roy de
France, qui aussi y estoit lors logié. Et l'endemain jour de lundi,
ledit Lyonnel disna avecques la royne en l'ostel du roy près de
Saint-Pol, là où elle estoit logiée, et y fist-l'en très grant feste. Et
après disner, quant l'en ot dancié et joué, ledit Lyonnel et lesdis deux
frères du roy qui tousjours le compaignoient, s'en retournèrent audit
Louvre devers le roy et souppèrent avecques luy, et tousjours coucha
ledit Lyonnel au Louvre. Et le mardi ensuivant, dix-huitiesme jour du
moys d'avril dessus dit, lesdis ducs de Berry et de Bourgoigne donnèrent
à disner et à soupper audit Lyonnel et à ses chevaliers et autres gens
qui y vouldrent estre, en l'ostel d'Artois à Paris; et alèrent au gesir
au Louvre. Et le mercredi ensuivant, ledit Lyonnel disna et souppa
avecques le roy et luy fist le roy moult de grans dons et à ses gens
aussi, qui valoient, si comme l'en estimoit, vint mille florins et plus.
Item, le jeudi ensuivant, ledit Lyonnel se parti de Paris, et le fist le
roy convoier par le conte de Tanquarville jusques à Sens, et par autres
chevaliers jusques hors du royaume.
Et assez tost après, ceux qui estoient dedens le moustier d'Ay se
rendirent et furent pris à raençon; car il n'avoient plus de vivres
dedens ledit moustier. Et demourèrent lesdites compaignies au
Meucien[252] en divers logeys. C'est assavoir à Lisy, à Acy, à
Fontaines-les-Nonnains et environ, jusques au vendredi douziesme jour de
may, l'an mil trois cens soixante-huit dessusdit; lequel jour se
deslogièrent et s'en alèrent vers Chaalons, vers Vitry en Pertois et en
celle marche; et y firent moult de maux comme d'ardoir maisons, tuer
gens, efforcier femmes et pluseurs autres maux. Et en celle marche
demourèrent jusques environ le commencement du moys de juing, et
parla-l'en à eux par pluseurs fois, afin que il partisissent du royaume;
mais il demandoient si grandes sommes de florins, c'est assavoir au
moins quatorze cens mil frans d'or, que l'en n'y voult point entendre
pour le roy, et partout celuy temps avoit le roy grant nombre de gens
d'armes en pluseurs bonnes villes, comme Sens, Troyes et Chaalons,
Provins et autres, èsquelles villes lesdites gens d'armes faisoient tant
de excès et de maux que ce estoit pitié.
[252] _Au Meucien_. En _Multien_, pays de la Brie. _Lisy-sur-Ourq_, à
trois lieues de Meaux. _Acy-en-Multien_, à sept lieues de Senlis.
Item, le vendredi neuviesme jour de juing mil trois cent soixante-huit
dessusdit, lesdites compaignies qui s'estoient deslogiées de devant
Vitry passèrent par assez près de Troyes et se alèrent logier vers
Marigny[253] et au pays environ. Et lors estoit à Troyes le duc de
Bourgoigne, mais il n'avoit pas gens pour combattre à eux: et s'en
alèrent passer la rivière d'Yonne vers Aucerre, et alèrent vers
Chastillon-sur-Louen, devant Montargis et par tout le Gastinois, droit
vers Estampes. Mais il séjournèrent tant en Gastinois que il fu avant le
quatriesme jour de juillet que il feussent environ Estampes; et
boutèrent les feux en pluseurs lieux et villes en leur chemin. Et pource
que l'en disoit communelment que il venoient devant Paris, le roy manda
gens d'armes à Paris. Et en celuy an meisme, la derrenière sepmaine de
juin, le roy fist deux mareschaux nouveaux, c'est assavoir: Messire Loys
de Sancerre et messire Mouton de Blainville. Car le mareschal Bouciquaut
estoit mort, et messire Arnoul d'Odenehan avoit renoncié à l'office, et
le roy luy avoit baillié l'oriflame. Et environ quinze jours devant, le
roy avoit fait amiral de la mer messire François de Perilleux et en
avoit osté le Baudrin de la Heuse.
[253] _Marigny_. Entre Troyes et Nogent-sur-Seine.
Item, le mardi quart jour de juillet, lesdites compaignies se logièrent
à Estampes et à Estrichi[254]. Et y demourèrent jusques au dimenche
ensuivant, neuviesme jour dudit moys, que se deslogièrent les Gascoins
qui, si comme l'en disoit, se deffioient des Anglois et les Anglois
d'eux; et s'en alèrent à Baugency-sur-Loire, et les Anglois alèrent en
Normendie et pristrent la ville de Vire: et y entrèrent de jour comme
tous hommes de ville, armés dessous leur grosses robes, premièrement
environ quarante ou soixante; et quant il orent gaaigné la porte, leur
grosses routes vindrent après, mais il ne pristrent pas le chastel; car
pluseurs de la dite ville se retraistrent dedens, qui bien le
deffendirent et gardèrent; et aussi fu-il assez tost après raffreschi de
gens d'armes. Et environ quinze jours après, une partie desdis Anglois
de compaignie, environ quatre cens ou cinq cens, s'en alèrent en Anjou
et pristrent la ville de Chasteau-Gontier par la manière qu'il avoient
prise Vire. Et lesdis Gascoins se tindrent bien trois sepmaines ou un
moys en ladite ville de Baugency; et pluseurs fois ala le seigneur de
Lebret de par le roy de France par devers eux pour traictier, comme il
vidassent le royaume de France; et en espérance de certain traictié
pourparlé et non passé entre eux, lesdis Gascoins passèrent la rivière
de Loire par devers la Sauloigne; et crut tant la rivière, assez tost
après, que il ne la porent rappasser sans pont; et ainsi demourèrent une
pièce, en attendant la response dudit traictié que le seigneur de Lebret
avoit porté devers le roy.
[254] _Estrichi_. Ou _Estrechy_.