De l'omaige que Jehan de Montfort fist au roy de France du duchié de
Bretaigne, et coment la femme dudit Charles y renonça.
L'an dessus dit mil trois cens soixante-six, au mois de décembre, c'est
assavoir le treiziesme jour, messire Jehan de Montfort, lors duc de
Bretaigne, par le traictié dont dessus est faite mencion, fist l'omaige
lige à Paris au roy de France Charles, du duchié de Bretaigne et de
toutes les autres terres que il tenoit au royaume de France. Et se parti
du roy en bonne grace et amour que l'un avoit à l'autre, si comme il
sembloit; et si luy fist le roy de beaux dons de joyaux et de chevaux.
Et en celuy mesme temps la duchesse, femme du duc mort en la bataille
dessus dite, ractefia, en sa personne, audit duc de Bretaigne, en la
présence du roy et de son conseil, le traictié fait par le sire de
Beaumanoir et les autres, ses procureurs dessus escrips, en renonçant
audit duchié par la manière dont il avoit esté traictié, et requérant au
roy que ainsi le confermast et prononçast en force et vertu d'arrest. Et
ainsi fu fait et prononcié en la présence du roy et des deux parties,
par messire Jehan de Dormans, lors evesque de Beauvais et chancelier de
France. Item, le lundi, sixiesme jour dudit moys de décembre, madame
Jehanne, fille dudit roy de France Charles, mourut à Paris en la
Conciergerie, ostel du roy[241], lequel ostel est près de Saint-Pol. Et
le mardi ensuivant fu enterrée en l'églyse Saint-Denis, en France.
[241] _En la conciergerie, ostel du roy_. Les éditions précédentes,
qui pourtant deviennent à compter de ce règne moins grossièrement
inexactes, portent seulement ici: _En l'ostel du roy_.
Item, au moys de février ensuivant, l'an mil trois cens soixante-six
dessus dit, furent apportées nouvelles à Paris pardevers le roy de
France Charles, que un sien chambellan, appellé messire Jehan de La
Rivière, lequel estoit alé oultre-mer environ la nativité Saint-Jehan
précédent, estoit trespassé de ce siècle à Fomagosce[242] au royaume de
Chypre, environ la feste de Toussains précédent; de laquelle mort le roy
fut moult dolent, car il l'amoit moult. Et fu le corps enterré en la
ville de Coste, en laquelle l'en dit que Sainte-Katherine fu née, et
pour ce, luy fist faire ses obsèques moult solennels et notables en
l'églyse Sainte-Katherine-du-Val-des-Écoliers, à Paris, le mercredi
dix-septiesme jour dudit mois de février, les vigiles et le jeudi
ensuivant la messe; et y fu ledit roy présent et tous les prélas et
officiers du roy estant à Paris. Et en celuy mesme moys de février
furent apportées nouvelles en France que le cinquiesme jour du mois de
décembre précédent, le roy de Chypre et pluseurs crestiens en sa
compaignie, avoient pour la seconde fois prise la cité d'Alexandrie et
la tenoient; car l'autre fois que ledit roy de Chypre l'avoit prise l'an
précédent, il l'avoit tantost laissiée, pour ce que il n'avoit pas assez
gens pour la tenir. Et toutes voies ne fu ce pas vrai, car jà soit ce
que ledit roy de Chypre féist moult grant armée et que avecques luy
feussent grant quantité de crestiens de diverses nations, il ne se
traist plus vers ladite ville d'Alexandrie, mais fu fait un traictié
entre luy et le soudan, par lequel il orent une longue triève par
certaine somme de florins que ledit soudan en donna audit roy de Chypre,
si comme l'en disoit.
[242] _Fomagosce_. Famagouste.
Item, en ce dit moys de février mil trois cens soixante-six dessus dit,
le prince de Galles qui, si comme l'en disoit, avoit receu grant somme
de florins dudit roy Pierre de Castelle pour luy aidier, passa par le
royaume de Navarre, accompagnié de grand nombre de gens d'armes,
archiers et autres gens de pié, par traictié que il fist avecques ledit
roy de Navarre, pour aler en Castelle contre ledit roy Henry. Et
toutesvoies cuidoit ledit Henry que iceluy roy de Navarre feust alié
avecques luy, et pour cela avoit donné grant somme de florins. Mais pour
ce que ledit prince luy en donna aussi, il se consenti que ledit prince
passast par son pays, et ainsi le fist et ledit roy Pierre avecques luy,
et entra en Castelle; dont le roy de Navarre acquist grant blasme et
déshonneur.