Coment les gentilshommes de Bourgoigne laissièrent le roy de Navarre.
Le vendredi vingt-deuxiesme jour dudit mois de juing, le roy de Navarre
parti de Paris et avecques luy pluseurs de ladite ville et pluseurs de
ses gens. Et estoient environ six cens glaives, et alèrent à Gonesse où
pluseurs autres des villes de la visconté de Paris les attendoient. Et
deux jours ou trois devant, pluseurs des gentilshommes qui avoient esté
avec ledit roy de Navarre une partie de la saison et encore estoient,
espécialement ceulx du pays de Bourgoigne, prisrent congié dudit roy de
Navarre, quant il virent que il avoit accepté la capitainerie de ceus de
Paris, en disant que il ne seroient point contre ledit régent né contre
les gentilshommes; et s'en partirent et s'en alèrent en leur pays. Et
ledit roy et sa compaignie s'en alèrent vers Senlis.