Coment le roy de Navarre fist despendre les dessus dis décapités à
Rouen, et les fist enterrer solempnellement.
Le mercredi ensuivant, dixiesme jour du moys de janvier, le roy de
Navarre envoia, au matin, au gibet de Rouen, pour despendre et ensevelir
les corps des trois dessus dis que le roy de France avoit fait
descapiter en sa présence, lorsque le roy de Navarre fu pris. Auquel
gibet ne fu rien trouvé du conte de Harecourt, car lonc-temps avant il
avoit esté osté; mais l'en ne savoit par qui, combien que l'en supposoit
que ce eussent fait ses parens. Et là furent ensevelis par trois
rendues[72] de la Magdaleine de Rouen le corps du seigneur de Graville,
de monseigneur Maubué de Mainesmares, et de Colinet Doublet, qui encore
avoient esté audit gibet sans les testes; et furent mis en trois
coffres, tels comme on a accoustumé de faire pour mors. Et il y ot un
autre coffre wit[73] pour représentacion dudit conte de Harecourt:
lesquels coffres furent mis en trois chars[74] à dames qui là avoient
esté amenés pour celle cause. Et fu le coffre qui faisoit la
représentacion dudit conte en l'un desdis chars, le seigneur de Graville
en l'autre, et les deux autres coffres en l'autre char. Et ledit jour,
environ heure de tierce, ledit roy de Navarre à cheval et très grant
foison de peuple avec luy à cheval et à pié, partirent de Rouen et
alèrent au gibet dessus dit; et là ot cent varlés qui portoient cent
grans torches; et avoit chascun varlet un escusson des armes dudit roy
de Navarre. Et fist ledit roy charier lesdis coffres jusques à un lieu
près de Rouen appellé le Champ du pardon auquel lesdis corps avoient
esté descapités en la place: au plus près que l'en pout de là où il
avoient esté descapités furent lesdis chars arrestés; et là furent
chantées moult sollempnellement vigilles des mors, par grant foison de
gens de pluseurs religions qui estoient là alés pour celle cause; et
cela fait, lesdis chars furent mis au chemin: c'est assavoir, celui où
estoient les deux coffres devant; et après ledit char avoit deux
escuiers armés des armes dudit Maubué et Colinet, montés sur leur
chevaux, et leur amis après. Et après, estoit le char auquel estoit le
corps dudit seigneur de Graville; et après avoit deux hommes à cheval
qui portoient deux bannières de ses armes, et deux autres sur deux
chevaux armés, l'un pour guerre et l'autre pour tournoy, et après
estoient les amis dudit seigneur. Et après estoit le char auquel estoit
la représentacion dudit conte de Harecourt et deux varlés et deux hommes
armés, le roy de Navarre et les amis du conte. Et ainsi furent charriés
jusques à la porte derrière le chastel de Rouen, c'est assavoir jusques
au lieu où il avoient esté mis dedens les charretes quant on les mena
exécuter. Et là furent arrestés et furent mis hors lesdis coffres desdis
chars, et les pristrent chevaliers et escuiers si comme on a acoustumé à
porter corps. Et les portèrent jusques à Notre-Dame de Rouen en l'églyse
cathédrale. Et ledit roy de Navarre et merveilleusement grant peuple
aloient après à pié; et fu moult tart quant il furent en ladite églyse.
Et là furent mis en une chappelle couverte de cierges qui avoient bien
vint-sept piés de lonc. Et en chascun des pilliers de ladite église
avoit une grant pièce de cendal atachiée, dedens laquelle avoit quatre
escus petits des armes dessus nommées.
[72] _Rendues_. Religieuses.
[73] _Wit_. Vide.
[74] _Chars_. Variante: _Chairs_.