Coment monseigneur le duc, par le conseil que il ot et aussi par sa
benignité, ala premièrement devers le roy de Navarre, en l'ostel de la
royne Jehanne.
Le samedi ensuivant, ledit monseigneur le duc assembla de ceux de son
conseil tant et tel comme ledit evesque voult; et furent exposées les
requestes que faisoit ledit roy de Navarre, et fut dist que chascun y
pensast. Et l'endemain jour de dimenche, tiers jour dudit moys de
décembre, retournaissent au conseil.
Iceluy jour de samedi, après diner, ledit duc ala en l'ostel de ladite
royne Jehanne, par le conseil qui luy fu donné, pour parler audit roy de
Navarre qui encore n'avoit esté par devers luy né parlé à luy. Et assez
tost après que ledit monseigneur le duc fu venu audit ostel, ledit roy
de Navarre y ala à grant compaignie de gens d'armes; et toutesvoies
monseigneur le duc y estoit alé à assez petite compaignie, sans aucunes
armes. Et quant ledit roy de Navarre entra en la chambre où estoit
ladite royne et ledit duc, lesdis duc et roy s'entre saluèrent assez
mortement. Toutesvoies convint-il que les sergens d'armes qui estoient
alés avec ledit duc audit ostel, et gardoient l'huys de la chambre où il
estoit, se partissent, ou l'en leur eust fait villenie. Et demourèrent
les gens dudit roy de Navarre en la garde dudit huys, comme maistres et
souverains que il se tenoient; et là parlèrent assez ensemble, et pou
après se départirent.