Coment le prévost des marchans, avec pluseurs habitans de la ville de
Paris, alèrent par pluseurs fois par devers monseigneur d'Anjou, pour
faire cesser la nouvelle monnoie qui couroit pour le temps.
Le samedi ensuivant, dixiesme jour de décembre, fu publiée à Paris la
nouvelle monnoie qui avoit esté faite par l'ordenance dudit monseigneur
le duc de Normendie, et par son conseil; c'est assavoir: deniers blans
de six sous huit deniers de taille, et de quatre deniers d'aloy,
appellée monnoie quarante-huitiesme; et avoit chascun denier cours pour
douze deniers tournois. Et autres blans deniers, qui par avant couroient
pour huit deniers tournois la pièce, furent rabaissiés à trois tournois;
et le mouton d'or fu mis à trente sous tournois. Desquelles choses le
commun de Paris fu moult esmeu, et par espécial pour cause de ladite
nouvelle monnoie; car ceux qui gouvernoient la ville ne vouloient
souffrir ledit monseigneur le duc avoir finances, sans lettre de
gaaignier[56]. Et, pour celle cause, le prévost des marchans et pluseurs
des habitans de ladite ville de Paris alèrent au Louvre le lundi
ensuivant, douziesme jour dudit moys, par devers ledit conte d'Anjou qui
estoit demouré lieutenant de monseigneur le duc de Normendie qui estoit
alé par devers l'empereur son oncle, si comme dessus est dit. Et luy
requistrent que il voulsist faire cesser ladite monnoie en luy disant
que il ne souffriroient point qu'elle courust; et de fait empeschièrent
ledit cours, et ne souffrirent que aucun la préist ou méist.
[56] _Sans lettre de gaaignier_. Ainsi portent les meilleures leçons;
mais quelques manuscrits remplacent ces mots assez obscurs par
ceux-ci: _Sans leur congié_ ou _sans leur dangier_. Ce qui
s'entendroit mieux. J'ai dû cependant préférer les textes
authentiques.
Si leur fist dire ledit conte que il auroit avis à son conseil sur
ladite requeste, et l'endemain, au jour de mardi, leur respondroit.
Auquel mardi retournèrent audit Louvre lesdis prévost des marchans et
habitans, en plus grant nombre quatre fois que il n'avoient fait la
journée devant; mais pour ce que ledit conte n'avoit pas encore eu
plenière délibéracion sur ladite requeste, il leur fist dire et prier
que il attendissent jusques à l'endemain, jour de mercredi; et lors
tournaissent devers luy, et il respondroit tant que il leur devroit
suffire.
Auquel mercredi retournèrent ledit prévost et habitans par devers ledit
conte d'Anjou en trop plus grant nombre que par avant, et leur fist
accorder que l'en cesseroit de faire ladite monnoie jusques à tant que
ledit conte d'Anjou sauroit la volenté dudit duc de Normendie, son
frère, par devers lequel il pensoit tantost envoier pour celle cause, et
escripre la requeste des dessus dis de Paris.
Et ainsi se départirent et ne courut puis ladite nouvelle monnoie. Et
aussi ne furent point gardées les ordenances faites sur les cours des
autres monnoies; mais furent prises et mises si comme par avant
estoient.
Item, le samedi vingt-quatriesme jour dudit moys de décembre, qui fu la
vigille de Noël, mil trois cens cinquante-six dessus dis, le pape
prononça six cardinaux nouveaux, desquels fu l'un dessus nommé
monseigneur Pierre de la Forest, arcevesque de Rouen et chancelier de
France.