De l'assemblée que le roy fist faire en parlement des nobles, du clergié
et des bonnes villes, pour ordener aydes à soustenir le fait de la
guerre.
En ce meisme an, à la saint Andrieu, furent assemblés à Paris, par le
mandement du roy, les prélas, les chapitres, les barons et les villes du
royaume de France; et leur fist le roy exposer en sa présence l'estat
des guerres, le mercredi après la saint Andrieu, en la chambre du
parlement, par maistre Pierre de la Forest, lors arcevesque de Rouen et
chancelier de France. Et leur requist ledit chancelier, pour le roy, que
il eussent avis ensemble quelle aide il pourroient faire au roy, qui
feust suffisant pour faire les frais de la guerre. Et pour ce que il
avoit entendu que les sougiés du royaume se tenoient forment à grevés
par la mutacion des monnoies, il offri à faire forte monnoie et durable,
mais que on luy féist aide qui fust souffisant à soustenir la guerre.
Lesquels respondirent c'est assavoir: le clergié, par la bouche de
maistre Jehan de Craon, lors arcevesque de Rains; les nobles, par la
bouche du duc d'Athènes; et les bonnes villes, par Estienne Marcel, lors
prévost des marchans à Paris, que il estoient tous prests de vivre et de
mourir avec le roy, et de mettre corps et avoir en son service; et
délibéracion requistrent de parler ensemble, laquelle leur fu ottroiée.