Samideanoj en Boulogne-sur-Mer faris publikan pruvon pri la utileco
de Esperanto per tiu cxi gazeto. Trovinte Francajn amikojn kiuj
komprenis la Anglan lingvon, ili petis ke tiuj cxi traduku en la
Francan la dulingvajn artikolojn en nia unua nombro. La Esperantistoj
ankaux faris same. La rezulto estis rimarkinda. La tradukoj de la
Esperantaj adeptoj estis pli akurataj ol tiuj de la studentoj de la
Angla lingvo. Tiel oni praktike pruvis ke Esperanto estis ankaux
tauxga ilo per kiu lerni naturajn lingvojn! Ili ankaux sammaniere
tradukis _La Suno Hispana_.
* * *
Ni bedauxras ke ni ne havas suficxe da spaco por doni cxiumonate
malgrandan priskribon pri niaj samtempaj gazetoj Esperantaj. Eble la
Lingvo Internacia, L'Esperantiste kaj la Belga Sonorilo estas tiel
bone konataj de nia legantaro kiel estas La Lumo. Sed tre malgranda
nombro de Anglaj Esperantistoj vidis la novan (mi estis dironta la
plej novan sed _tiu cxi_ Esperantist estas la lastenaskita)
_Hispana Suno_. Gxi estas dekdupagxa monata gazeto en la lingvoj
Hispanaj kaj Esperantaj, kaj enhavas multe da tre interesa kroniko.
Oni ne trovos rakontojn aux poemojn, sed la organo estos tre utila
por cxiuj kiuj deziras lerni la lingvon de Cervantes; cxar la
paralelaj tradukoj estas lauxvortaj.
* * *
La Sekretario de la Edukada Regnafako[37] skribis, antaux ne longe, al
Sinjoro Ellis (Keighley), respondante je lia propono ke la instruado
pri Esperanto farigxus parton de la edukada kurso en la lernejoj
popolaj kaj dugradaj. Li diris ke "La fakestroj ne estas pretaj por
akcepti la proponon nuntempe." Movi regnan fakon estas longa afero,
sed espera fajrereto kusxas kasxe en tiu vorto _nuntempe_.
* * *
Sinjoro Ellis ankaux sciigas nin ke Sinjoro Wackrill, Colombo,
Ceylon, komencis kurson, esperante plioficiale fondigi societon kiam
la membraro estos plimultigxinta.
Ni bonvolas sukceson je lia entrepreno, kiu speciale interesas nin
cxar gxi estas la unua peno por disvastigi Esperanton en Ceylon.
* * *
Sinjoro Metcalfe diras ke li nun komencis korespondan sxakludon kun
Subleuxtenanto L. Jamin (Antverpeno). Ambaux el ili cxiam skribas en
Esperanto kaj Sinjoro Metcalfe nun atendas la kvaran movon.
* * *
La unua kunveno de la nova Esperanto Society en Brixton estis tre
sukcesa. Preskaux cent cxeestantoj auxskultis paroladon pri la lingvo
internacia kaj gxia gramatiko. Poste, dudeksep el ili membrigxis kaj
la cxiusemajna kurso komencis. Sinjoro E. W. Eagle, 21, Kellett Road,
Brixton, estas la Hon. Sek.; kaj li volonte respondos je cxiuj
demandoj pri la nova societo, kies jarabonpago estas 2s. 6d.
* * *
Jen estas ankaux bonaj novajxoj de Plymouth. Sinjoro Treleaven
paroladis cxe la Athenaeum, Plymouth, kaj, post kelkaj tagoj, donos
similan paroladon en Liskeard, Cornwall.
Oni devas gratuli tiun cxi energian varbiston kaj esperi ke la du
paroladoj kreos multajn samideanojn kaj eble fondigos novajn kursojn.
* * *
Tiu cxi estas nur la dua nombro de The Esperantist, sed gxi
estas la lasta de la jaro 1903a. La Redaktoro deziras sendi
internaciajn salutojn al cxiuj amikoj, cxu Angloj, cxu alilanduloj,
kaj gratuli ilin pri la bona progreso kiun Esperanto faris dum tiu
cxi jaro. Esperanto cxiam kreadas entuziasmulojn;[38] sekve gxi
kreskadas pli kaj pli rapide.
Antaux dekdu monatoj, la bela lingvo estis preskaux nekonata en tiu
cxi lando. Nun jen estas tie cxi almenaux 5,000 personojn kiuj
acxetis lernolibrojn; kaj unu lernolibro ofte instruas multajn
lernantojn. Kaj tiu cxi ne estas la plej bona atesto pri la
praktikeco de Esperanto. Multaj el niaj cxi-tieaj samideanoj jam
estas adeptoj, kaj skribis bonajn kaj interesajn artikolojn por tiu
cxi malgranda organo. Vere, mi dubas cxu estus eble ke oni redaktu
gazeton en natura lingvo ajn, post dekdu monatoj de lernado; ecx se
tiu lernado estus estinta treege koncentrigita. Sed tia estas la
simpleco de Esperanto, gxia logikeco, gxia senescepteco, ke oni povas
eldoni monatan gazeton en la nova lingvo kaj ricevi la aprobon de
Doktoro Zamenhof mem. Vivu Esperanto! Vivu Doktoro Zamenhof! Vivu
cxiuj amikoj kiuj komencas disvastigi la internacian lingvon tra la
multelingva mondo!