1473. Die 11 Februarij.
_Comissione segreta ad Ambrogio Contarini._
_Ser Ambrosio Contareno
oratori ad illustrissimum dominum Ussonum Cassanum._
Per la patente tua commission te havemo imposto quello che generalmente
rechiede la materia e che se convien a la comunication havrai
a far cum l'ambassador regio. Qui nui te parleremo alquanto più
particularmente cussì de la guerra come de la pace, et è nostra intention
che tutto questo appresso de ti sia secretissimo per quella forma
te sarà comandato, zoè che prima che tu parti de Italia, tu impari
molto ben e tengi a memoria cum quelli contrasegni e zifre parerà
a ti, questo foglio in tutto brusi et consumi, sì che mai possi esser
veduto per alguno.
Existimando nui questo anno passato, che quello serenissimo signor
fusse per intrar in la Natolia et venir a la extintion del Othoman,
havevamo dato comandamento al capitanio nostro zeneral da mar,
che cum tuta l'armata vigoroxamente intrasse nel Streto e penetrasse
fino a Costantinopoli mettendo a focho e consumando tuto da l'una
e dal altra ripa, per el che seria stata forza a lo inimico remandar
bona parte de le gente suo a difexa de la propria caxa et sedia soa,
e tanto serìa stato mancho potente contra al potentissimo exercito
de la soa sublimità, cum grandissima confusion et perturbation de
tuto el stato suo, per la intersecation e division de ogni comodità sì
de victuarie, come de ogni altra cossa de la Grecia in la Natolia, et cum
certo sollevamento et rebellion de molte sue provincie e luoghi de la
banda de la Grecia che poteria facilmente esser la ultima ruina de
tuto el stato suo in l'una et in l'altra provincia.
Intexo dapoi per letere del nobel homo Catarin Zen nostro ambassador,
quello excellentissimo signor haver facto altra deliberation
e drizarsi ad altro cammino, aviassemo cum celerità verso le marine
del Caraman le munition, artiglierie et homeni al manizarle experti,
richiesti per soa celsitudine, le qual ancora se ritrovano in
Cypro et ritrovase anche l'ambassador nostro cum i presenti che nui
mandèmo per honorar sua illustrissima signoria.
El capitanio veramento nostro che come havemo dicto aspectava
de intrar in Strecto, havendo da nui oltra el primo quello anche reservato
et exceptivo comandamento de far in tuto e per tuto quanto
comanderia quel potentissimo signor, havendo ricevuto lettere dal
signor Caraman et cussì da ser Catarin Zen nostro ambassador, che
dichiariva la intention et voler del soprascripto illustrissimo signor
esser, che cum l'armada se conferisse a le marine del predecto signor
Caraman et quello aiutasse a lo acquisto del suo stato, cussì
fece conferendosi lì cum l'armata e tute munition, et acquistò et restituì
a quel signor quelle castelle et luoghi sape (che sa) la sublimità
sopradicta, aspectando sempre la venuta de quella o de la scorta per
assegurarli et assignarli le artigliarie predicte, e lo ambassador nostro
per venir a la presentia soa per honorar quello come desideriamo.
Successe, stando in questa expectatione, la battaglia fra la celsitudine
soa et l'Othoman, per la qual è lo inimicho reducto in grandissimo
extermio, licenziate le reliquie del suo esercito, le qual non ponno
non confessar la loro extrema et incedibel strage e ruina, e ritrovase
el paexe et dominio suo desperato et consumato et cum continua
angossa e paura della ritornata a suo ultimo excidio del soprascripto
illustrissimo signor.
Queste cosse volemo che tu dichiari a do fini: l'uno perchè questo
passato anno dicto illustrissimo signor intendi et cognossi el vero
successo de le cosse dal canto nostro e de la speranza conceputa per
lui de i presidij nostri, se reputi satisfacto da nui et siane anche
certo in lo avenire per ogni imprexa che la soa subblimità deliberi
prender.
L'è ben vero che per lo desiderio nostro vossamo (vorremmo)
e judichemo sarìa più in proposito proseguir totis viribus contra
l'Othoman, soa sublimità per terra, e nui nel Streto come de sopra
havemo dicto, che come havemo già dicto è pessimamente conditionato,
per non aspectar che cum el tempo si resumi e fortifichi, perchè
vincto et estincto costui, niuna più difficultà resta ad esso
eccellentissimo signor a la monarchia de tuta l'Asia. Ma quando pur
sua celsitudine a la Sorìa più presto fosse disposta per parerli più
facilitar et meglio disponer l'impresa nostra contra l'Othoman el qual
per niente è da lassar in riposo, dichiarali anche che ad essa imprexa
lui è per haver niente mancho l'armata, munition, favori et presidii
nostri tuti, come de coloro che cum sua sublimità se reputemo
conjuncti et uniti in partecipation de ogni fortuna.
De parte 50
De non 13
Non sincere 6
_Aggiunta proposta dai savi agli ordini._
Se per ventura tu ritrovassi el soprascripto illustrissimo signor
suspexo e tardo al moversi et presertim contra l'Othoman, e le raxon
già dicte de la facilità, utilità, gloria et necessità non lo persuadesse,
et anche per se medesimo a l'imprexa de la Sorìa ti paresse star in
dubio, perchè essendone per se incitado et volunteroxo basta che tu
l'offerischi quanto de sopra havemo dicto, in tal caxo per persuaderlo
e moverlo per qualche modo, facta ogni experientia de la Natolia,
e non si movando, tu suadili la Sorìa reame di tante victualie,
intrade e tute altre commodità inenarabile, al vincer veramente
niuna difficultà, domata continuamente et desiderata per lo inimico,
la qual unita ale forze del soprascripto illustrissimo signor insuperabile
per se medesime, et havendo in sua disposizione el mare per
mezo de l'armata nostra, per lo qual po' ricever soa sublimità ogni
necessario favore e lo inimico ogni danno et ogni disconzo, come
questi do superior anni per nui soli li avemo facto, cossa indubitatissima
è che l'Othoman in spacio brevissimo et senza difficultà
convegni esser per se medesimo suppresso et extincto et quello
excellentissimo signor libero dominator de tuto.
Queste cosse proponile, et sforzate de farle molto ben gustar et
intender, che o per l'una o per l'altra de queste imprexe la sublimità
predicta se movi, l'una vincta, l'altra è necessariamente obtenuta,
e non può fallir che cussì non sia. Tutto consiste nel celere
moto de quel signor, essendo tutte cosse al suo favor disposte più
che mai fusseno o potesseno esser per le allegate raxon: si che venendo
non gli è dubietà e difficultà alcuna, che soa celsitudine non
abbia ad esser el secondo Alessandro, et lassar in simel stato la soa
posterità.
De parte 74.
_Secreta XXVI._ Cornet, op. cit.