Optica delineatio Architecturæ Jacobi Barozzii: & primum, de stylobata
Ordinis Etrusci.
_Quandoquidem omnibus nota est Architectura Barozzii, eam hic penitus
immutatam cum suis regulis particularibus, & generalibus expono; Metieris
autem illam modulis ut fieri solet; qui igitur illam desiderat, in
sequentibus figuris inveniet totam, simulque discet opticè reddere. Cum
autem non minus Opticæ studioso quam Architecturæ necesse sit, efficere
delineamenta rei construendæ, ab hoc verè, ab illo fictè, id est, cum
uterque facere debeat vestigium, elevationem, sectionem, & faciem, ob id
delineavi hic stylobatam Ordinis Etrusci cum suo vestigio, quem vides
in ~AB~, ut faciliùs percipias quod in proxima figura dixi, à totidem
scilicet angulis prominentiarum elevationis, totidem ducendas esse
lineas super lineam vestigii; cum hoc necesse sit ad inveniendum illorum
angulorum cum istis lineis concursum in suis degradationibus. Nota,
longitudinem, quam voco ~F~ ductam in ~G~ esse illam, à qua non solùm
nascitur vestigii obliquitas, verùm etiam ab illa nascitur obliquitas
illius quam voco sectionem ~E~. Ob id in altero hujus ejusdem figuræ
stylobata totum id è contrario videbis._
_Non ampliùs repetam quonam modo eruatur nitida delineatio, de qua
superiùs pluries; dicam tamen angulos primi termini sectionis ~E~
daturos lineas planas faciei ~D~, & angulos vestigii daturos omnes
perpendiculares._