Explicatio linearum plani, & horizontis, punctorum oculi, & distantiæ; de
hoc ultimo pressiús.
_Tres lineæ diversi inter se nominis, & muneris, item, & duo puncta
præcipuè necessaria sunt, ut delineatio quælibet opticè reddi queat:
prima vocatur linea plani, secunda horizontalis ubi est punctum oculi;
de tertia loquar in elevationibus: alterum de duobus punctis assignatur
oculo, & vulgò dicitur punctum oculi; alterum verò assignatur distantiæ,
à qua nomen habet. Punctum oculi notissimum est, punctum verò distantiæ
non ità; in hujus igitur explicatione morabor, & ut clariùs ostendam
quid sit, & quomodo formandum sit, selegi descriptionem Ecclesiæ
geometricè habitam, quam in tres partes divisi, in vestigium, sectionem,
& interiorem faciem, in qua facie velit quis pingere, seu delineare
aliquid opticè, ut elongetur ad mensuram aperturæ quadrati ~P~, ut habes
in vestigio, & ad mensuram profunditatis ~Q~, quam habes in sectione._
_Super faciem ~CCCC~ quam puta esse delineamentum, habes rationem, qua
debes disponere supradicta puncta, & lineas. ~HI~ erit linea plani: ~NON~
erit linea horizontalis, quæ fieri solet distans à linea plani altitudine
hominis, ut vides in ~B~. Punctum oculi erit in ~O~; punctum distantiæ
erit in ~N~, ex qua parte malueris. Hoc punctum ~N~ debet tantum abesse
à puncto ~O~, quantum tuo arbitratu tu vis procul esse ut videas
profunditatem illius quadrati ~PQ~, sicut vides in exemplo vestigii, &
sectionis; ubi rem velut in suo statu naturali exhibeo; in iis enim tam
abest ~N~ ab ~O~, quam abest homo ab ~A~ ad ~DE~, & homo ~B~ in sectione,
ab ~FG~, ubi est murus in quo pingendum, vel delineandum est._
_Si ulteriùs curiosè descriptionem hanc consideres, videbis quam bene
respondeat quadratum ~P~ in plano, & elevatio ~Q~, ut naturalis status
rei in sectione Perspectivæ positæ in facie ~CCCC~, quæ est delineatio.
Videbis enim visuales, quæ secant in plano spatium ~RS~, ita pariter
secare spatium ~TV~ in elevatione: & segmentum visualium ~XZ~ in sectione
respondere ~YK~ in elevatione, quod demonstratione non caret._