_Coment le roy Loys ala à ost sus le conte de Clermont et son fils et
autres tyrans qui persecutoient les églyses et les povres et les pélerins;
et coment le roy les desconfist et prist._
Il advint en ce tems que le conte de Clermont en Auvergne et Guillaume le
conte du Puy son nepveu et le viconte de Polignac avoient acoustumé à
demener leur vie en rapine et en roberies, comme ceux qui roboient les
églyses et les pélerins et essilloient les povres gens. Les griefs et les
maux que ces desloyaux faisoient ne peuvent plus souffrir l'évesque de
Clermont en Auvergne né celluy du Puy, et pour ce qu'il ne povoient
contraster à eux né à leur force eurent conseil qu'il s'en vendroient
clamer au roy Loys. A luy s'en vindrent tout droit et luy prièrent pour
Dieu qu'il mist conseil à amender les maux que ces tirans faisoient à Dieu
et à saincte églyse.
Et le doux roy débonnaire, quant il eut oï la complainte des desloiautés
que ces tirans faisoient, assembla son ost hastivement et chevaucha en ces
parties tout encouragié de venger la honte et le dommage de saincte églyse.
Si estoit trop griefve ceste chose de prendre guerre contre tels gens qui
estoient riches et aisés et en leur pays et à merveilles bien garnis
d'avoir et de gens. A eux se combati en champ et par l'aide de Dieu et de
saincte églyse laquelle il deffendoit, luy avint si grant honneur lui les
desconfist et prist en champ de bataille et les emmena avecques soy en
chetivoison. Si les tint en prison tant qu'il luy pleut et luy jurèrent en
la parfin qu'il cesseroient des maux qu'il avoient acoustumé à faire. Bons
hostaiges donnèrent, atant furent délivres.