_Coment le conte Bernart le Danois et le roy Agrolde de Danemarche
prindrent le roy._
[241]Moult se doubta Bernart le Danois que le roy ne retournast avec
Hues-le-Grant, et qu'il ne feist plus grief aux Normans que devant. Pour ce
manda Agrolde le roy de Danemarche, qui encore demouroit à Cherbourch, que
il assemblast sa gent et la chevalerie de Costentin et de Baieux, et les
envoyast par terre; et il appareillast ses nefs et entrast en Normandie par
devers la mer et destruisist tout devant luy; si que il convenist que le
roy venist à luy à parlement; et ainsi pourroit vengier la mort le duc
Guillaume, son amy. Cil le fist volentiers: sa navie appareilla et entra en
la terre, par devers la marine. Tost fu la nouvelle sceue en France que les
Normans estoient retournés et qu'il avoient jà pris les pors et la marine à
grant multitude de nefs. Bernart le Danois et Raoul la Torte mandèrent au
roy ceste besoingne, et le roy assembla grant ost et s'en ala au plutost
qu'il peust à Rouen. Au roy Agrolde manda que il venist à luy à parlement
au gué qui est appelé Herluin, pour dire la raison pour quoy il dégastoit
ainsi son royaume. Moult plut ceste chose au roy paien, car il avoit grant
talent de vengier la mort du duc Guillaume. Quant il furent assemblés, si
disputèrent longuement de ce que le duc Guillaume avoit ainsi esté mort; et
un Danois regarda le conte Herlouyn, qui estoit sire du chastel, par quoy
le duc avoit esté occis; d'une lance le feri parmi le corps et le jeta mort
à la terre. Et Lambert, son frère et autres si coururent sus au Danois, et
les paiens les reçurent fièrement. Là eut grant bataille et fort; si en
occirent les Danois dix-huit des plus grans et des plus nobles, car il
estoient garnis et appensés[242] de mal faire, et le roy ne s'en prenoit
garde. Là eut faite grant occision de notre gent. Le roy meisme eut esté
prins; mais il monta seur un isnel[243] cheval, et, ainsi qu'il s'enfuyoit,
il chéy ès mains d'un chevalier. Moult le proia en promettant grans dons,
sé il le sauvoit des mains à ses ennemis; et le chevalier, qui pitié en
eut, l'envoia repostement en une isle. Et quant Bernart le Danois seut ce,
par ceulx qui luy rapportèrent, il envoia querre le chevalier et le mist en
prison. A la parfin recongnut-il coment il voloit sauver le roy par les
promesses que il luy faisoit; pris fu le roy et mené en prison à Rouen par
le commandement Bernart le Danois.