Tandis, parlèrent ensemble Omons, le maistre de l'enfant, et Yvons, le père
Guillaume de Bellesme, et conseillèrent à l'enfant Richart qu'il se
couchast en son list comme s'il fust forment malade et si durement que l'on
cuidast qu'il deust mourir. L'enfant, qui fu sage, le fist ainsi et
faignist que il fust si malade comme jusques à la mort. Les gardes qui ce
virent ne firent pas grant force de luy garder, mais s'en alèrent l'un çà,
l'autre là où il avoient à faire. Si avint ainsi que en my la mayson où
l'enfant gisoit avoit un faiscel d'herbe; et Omons prist l'enfant et le lia
dedens, et puis troussa sus son col comme s'il portast l'herbe à l'ostel
pour les chevaux: ainsi s'en ala hors des murs, jusques à son ostel et luy
avint si bien que le roy mangeoit à celle heure, et la gent de la cité
communément. Si que il paroit trop pou de gens parmy les voies. Tantost
prist l'enfant et monta sur un cheval et s'enfuy jusques à Coucy. L'enfant
livra en garde au chastelain. Toute nuit chevaucha jusques au matin qu'il
vint à Senlis. Moult s'émerveilla le conte Bernart, quant il le vist si
matin, et luy demanda coment son nepveu Richart le faisoit. Moult fu lié
quant Omons luy eut la besoingne comptée. Tantost s'en alèrent à
Hues-le-Grant; la besoingne luy discovrirent et prinstrent de luy le
serement que il l'ayderoit à délivrer l'enfant. Grant gent assemblèrent et
s'en alèrent à Coucy et en ramenèrent l'enfant à Senlis, à grant joie.