_Ci comence du roy Raoul, coment il fu coroné à roy et vertueusement
governa le roïaume._
Quant Charle-le-Simple fu ainsi emprisonné par trahison, si demoura l'estat
du royaume moult périlleusement. Lors s'accorda que un sien filleul, qui
avoit nom Raoul et eut esté fils Richart, le duc de Bourgoingne, fust
couronné. A ce s'accorda Hugues-le-Grant et les autres barons de France. Si
fu cil Raoul couronné à Soissons. Grant pièce de temps demoura Charle en
prison. Maint mal et maint grief y souffri, et à la parfin mouru-il et fu
enseveli en l'églyse Saint-Foursin. Son fils Loys, que il avoit eue de
Algine, la fille au roy d'Angleterre, s'enfui à son aioul, car il se
doubtoit moult que autelle meschéance ne l'y avenist comme à son père; et
si sembloit que il feust plus seurement oultre-mer en estrange région que
en son propre royaume et entre ses gens meisimes. Vingt-sept ans régna
Charle-le-Simple. [209]Au temps du roy Raoul moult vindrent paiens en
Bourgoingne; grant partie du pays dégastèrent; François et Bourguignons
alèrent encontre, et fu celle bataille en un lieu qui a nom Kallos li
mons[210]. Mais moult y eut occis de crestiens; toutes voies eurent-il
victoire. (Le roy Raoul gouverna le royaume douze ans noblement et
vertueusement; et deffendi sainte Eglyse, et voult que le povre eust aussi
audience, en requérant son droit, comme le riche.) [211]Dessoubs ce Raoul
eut Hues-le-Grant le nom d'abbé, après son père le conte Robert, et tint
l'abbaye de Saint-Germain: et furent laiens, en son temps, trois déans: le
premier eut nom Armaire, le second Gobert et le tiers Albon. En ce temps
morut le roy Raoul. Enseveli fu en l'églyse Sainte-Colombe de Sens.