que il se laissa à dire, car au destroit chacuns fuit le mort
vollentiers; mès encorres disoit il que, se il quidast estre venus à
tel coron, il ne se fust jà rendus prisonniers, mès fès occire sus lez
camps, et que messire Garniers de Clichon avoit estet loyaux et
vaillans chevaliers, quant en se loyaulté il estoit mors. Ensi se
debatoient de parollez li chevalier et li escuier de Bretaingne, qui
adonc avoec le comte de Montfort estoient, à monseigneur Henry de
Pennefort; car trop envis le ewissent veut pendre, ne recepvoir nul
dammaige dou corps. Et chil de Rennes parlementoient, li petis contre
les grans, et estoient en grant estri ens le place où il estoient tout
assamblet. Car la coumunauté volloit que la cité fust rendue et
messires Henris de Pennefort delivréz; et li rice homme et grant
bourgois y estoient tout contraire, et disoient que jà n'avenroit que
il fesissent fraude, ne se desloyautaissent enviers leur droite damme
naturelle, pour ung chevalier, et que à trop grant meschief leur poroit
retourner. Nient mains touttez raisons remoustréez des grans as petis,
il n'y vorent point entendre, mès sonnèrent la cloche et se coururent
armer. Et s'esleva grans tumultes et dissentions entre les coummuns et
lez plus gros de le ville qui contraire estoient à leur vollenté; et
les coururent sus, et il se deffendirent. Là en y eult pluiseurs mors
et blechiéz, mès finablement li communauté obtinrent le place et furent
mestre et souverain à ce donc des grans. Et envoiièrent deviers le
comte de Montfort, en disant que il venist sceurement en le cité de
Rennes, on li recepveroit à signeur, mès que il reuissent monseigneur
Henry de Pennefort. Li comtez dist: «oil,» et fu de ces nouvelles mout
joiant, et vint en le cité de Rennes, et y entra en grant reverense de
trompez et de trompettez et de touttez mannierres de menestrandie. Et
vinrent li clergiet à grant pourcession contre lui et le amenèrent à
cel solempnité à le cathredal eglise; et là li jurèrent tout feaulté et
li fisent hoummaige comme à leur droit seigneur. Et ossi fist messires
Henris de Pennefort, qui devint ses homs et ses chevaliers: dont li
comtez eut grant joie, car il le sentoit preudomme et vaillant; et
puisqu'il en avoit le foy, il ne le frauderoit à nul jour. Se le retint
li comtez de son consseil, et li donna tantost cinq cens livrez de
revenue, et li assigna bien où il lez devoit prendre.
Ensi comme je vous recorde eut li comtez de Montfort la bonne cité de
Rennes, le foy et le feaulté des bourgois de la ville; et s'i tint par
cinq jours, pour lui rafreschir et reposer, et pour mieux entendre à
le fortrèce de le ville et atraire touttez mannierrez de gens à sen
amour. Et de tant comme il y fu, il y tint toudis court ouverte et
donna grans dons as bourgois et à touttez mannierres de gens dont il
entendoit le mieux à valloir; et tant fist qu'il y acquist grant grace.
Quant il s'en dubt partir, il y laissa ung chevalier de par lui à
cappitainne, breton bretonnant, en qui il avoit grant fianche; et
appielloit on cesti monseigneur Guillaumme de Quadudal, gentil homme et
preudomme durement. Au sixime jour, il s'en parti et coummanda à
deslogier touttez mannierres de gens et prendre le chemin deviers le
castiel et le forte ville de Hainbon; et emmena avoec lui monseigneur
Henry de Pennefort, car il en penssoit bien à avoir mestier en son
voiaige. Fo 54 vo.
P. 94, l. 13: deus cens.--_Ms. B 6_: trois cens. Fo 172.
P. 94, l. 21: le gait.--_Ms. B 6_: Sy fu au retour entre l'ost et le
chité enclos de mesire Hervi de Lion qui avoit fait le gait. Fo 172.
P. 95, l. 8: le porte.--_Ms. B 6_: et fist lever unes fourques droit
devant les fossés. Fo 173.
=§ 142.= P. 96, l. 11: Adonc.--_Ms. d'Amiens_: Li comtez Jehans de
Montfort se departi de Rennez et fist arouter ses os et son charoy pour
venir à Hainbon, ung très fort chastiel seans sus mer. Bien avoit oy
recorder que messires Oliviers de Pennefort, frèrez au dit monsseigneur
Henry, l'avoit en garde et en estoit castellains, et ossi que li
castiaux avoecq la ville estoient si fort que il ne faisoit mie à
prendre ne à gaagnier, sans trop loing siège. Et pour ce, en cheminant
celle part, il moustroit tous les signes d'amours qu'il pooit, à
monseigneur Henry de Pennefort, et li disoit: «Henri, Henri, vous estez
devenus mes homs et mes chevaliers. Si me devés toutte obeissanche et
tout service, et m'avés juret feaulté et à aidier à concquerre mon
hiretaige de Bretaingne et à destruire tous rebellez.»--«Sire, che li
dist messires Henris, il est verités. Et pourquoy le dittes vous? S'il
plest à Dieu, vous n'y veurés jà le contraire, puisque à ce me sui
adounnés et assentis.»--«Je le vous diray, ce dist li contes, nous
chevauchons deviers Hainbon, dont Oliviers, vos frères, est gardiiens
et cappittainne. Si ne voroie pas, pour l'amour de vous, qu'il ewist
nul dammaige dou corps; et se vous volliéz bien, adcertez nous
l'arions à nostre acord, et plus l'a(r)oie à avoir bellement que
fellement.»--«Sire, che respont messires Henris, or me monstréz voie,
s'il vous plest, comment ce se pourroit faire.»--«En nom Dieu, dist li
comtez, je le vous diray. Quant nous deverons demain aprocier le ville
de Hainbon à quatre ou à cinq lieuwes, vous prenderés quatre cens ou
cinq cens armures de fer des nostrez, et chevaucerés devant à tout les
bannières de Bretaingne, et li feréz assavoir que vous venés vers lui.
Je croy assés bien que il vous ouvera les portes, et quant vous seréz
ens et enssi que saisis de la ville, vous li mousterés sus quel estat
vous serés là entrés, et que c'est bon qu'il me reçoive comme son droit
seigneur.»--«Sire, che respont messires Henris, puisque à ce vous
m'esmouvés, et que de vostre ordonnanche vient, je le feray, mès je
deceveray mon frère.»--«Henri, Henri, ce dist li comtez, en fès d'armes
convient ung seigneur qui voet venir à ses ententes, soutillier
pluiseurs voies d'avantaige pour lui. Autrement il n'a que faire de
gueriier, et ceste est la plus proçainne que g'y puis ymaginer pour mon
prouffit, car Hainbon n'est mies ungs castiaux à concquerre par siège
ne par assault, sans grant coustage.» Fo 55.
P. 96, l. 11: li contes.--_Mss. A 11 à 14_: et la contesse. Fo 75.
P. 97, l. 10: six cens.--_Mss. A 11 à 14_: cinq cens. Fo 75 vo.
=§ 143.= P. 97, l. 25: Adonc.--_Ms. d'Amiens_: Sus les parolles dou
comte de Montfort s'ordonna messires Henris de Pennefort. L'endemain,
chevaucha li hos deviers Hanbon. Et si comme il pooient y estre à cinq
lieuwez priès, li dis messires Henris se parti dou comte et enmena
avoecq lui jusquez à cinq cens armures de fer, et chemina tous les
grans ghalos deviers le ditte fortrèche. Et quant il fu ensi que à une
petitte lieuwe priès, il envoya ung hiraut devant mander à son frère
qu'il venoit, et que il li vosist ouvrir les portes. Li hiraux fist
tout ce dont il fu chargiés. De la veuue monseigneur Henry de Pennefort
eut messires Oliviers, sez frèrez, si grant joie, qu'il ne demanda
oncquez s'il estoit amis ou ennemis, mès dist au hiraut: «Aléz contre
lui, et li dittez qu'il est li bien venus.» Ensi le raporta li hiraux à
monseigneur Henry, liquelz entra en le ville à touttes ses gens, et se
saisi de son frère et dou castiel. Et recorda à son frère comment li
affairez alloit en Bretaingne, et que li comtes de Monfort avoit jà à
lui et en son accord le plus grant partie dou pays, et bien estoit
tailliéz d'avoir le remanant, car nuls ne li alloit au devant. Et li
avoient grant plentet des seigneurs fet feaulté, et especialment cil de
Nantez et de Rennes, qui sont les souveraines chitéz dou pays et sour
qui tous li demorans se doit aviser.
Quant messires Oliviers de Pennefort eut oy son frère, et il se vit
pris et au desoubz de sa fortrèce, si fu durement courouchiéz, mès
amender ne le pot. Et dist bien que se il ewist senti ne seu que ses
frèrez dewist là venir en tel mannière, il n'y fuist mies entréz, car
vilainement l'avoit dechupt: «Certes, biau frère, ce respont messires
Henris, il est veritéz. Mès li comtez de Montfort, qui s'apelle et
escript dus de Bretaingne, en est cause, et li ai fet feaulté et
hoummaige, et vous li feréz ossi et devenrés ses homs: je le vous
consseille.» Respont messires Oliviers: «Voeille ou non, il convient
que je le soie, mès jou ewisse plus cher autrement, s'il pewist y
estre.» Que vous feroie je loing compte? Tant parla et precha messires
Henris de Pennefort que amiablement il le fist monter à privée mesnie
et sans armure, et chevauchier contre le comte de Montfort, qui le
rechupt liement et à grant joie, et li dist que de ce jour en avant il
seroit de son hostel et de son plus privet consseil; et li donna
tantost cinq cens livrez de revenues et li assigna bien où il les
prenderoit. Si entra li dis comtes en le forte ville de Hainbon, qui
est ungs grans et bons pors sus mer, et prist le foiauté et hoummaige
de tous lez hommez de le ville et dou chevalier ossi monseigneur
Olivier de Penefort, et y demoura trois jours et toutte se ost ossi; se
s'i rafreschirent. Et y ordonna li comtez castelain et gouvreneur pour
le garder et deffendre contre tous venans, s'il besongnoit, ung très
bon chevalier et de grant affaire, que on clamoit monseigneur Yvon de
Tigri, en qui li dis comtez se confioit moult, et trois cens
saudoiiers, touttes bonnes armurez de fer, et paiiés de leurs gaiges
pour ung an.
Quant li comtez de Montfort se fu mis en saisinne et en possession de
le forte ville et dou biau castiel de Hainbon, et ordonné garnison
telle qu'il li pleut, il eult consseil et advis qu'il se trairoit
deviers le cité de Vennes. Si fist arouter son ost, cargier son caroy
et cheminer celle part. Ainchois qu'il y parvenist, il fist traitier à
chiaux de Vennes que il le volsissent recepvoir à signeur, et il leur
seroit très bons sirez; et lez tenroit as us et as coustummes que li
dus de Bretaigne, ses frèrez, dairains trespasséz, les avoit tenus, ou
à milleurs. Quant cez nouvellez vinrent en le chité de Vennes, il
sonnèrent leur cloche et s'asamblèrent. Et quant il furent tout
assamblet, les offres, les ordonnanchez, les proummesses et lez
requestez, que li comtes de Montfort leur faisoit, furent là
remoustrées et recordées. Li aucun s'acordoient à lui recepvoir à
seigneur, et li aucun, non. Toutteffois, une souffranche fu prise à
durer troix jours, et là en dedens estre devoient tout conssilliet dou
faire ou dou laiier. Ceste souffranche durant, li comtez ne laissa miez
pour ce que il ne se logast bien et puissamment devant Vennes et ne le
asegast de tous poins, mès nul contraire ne fist à le chité; ainsçois
leur offroit toutte amour et grans bienfès, là où il le volroient
recepvoir à seigneur. Cil de Vennes se consseillièrent li ung par
l'autre, et regardèrent que il estoient sus l'un des corons de
Bretaingne, et que Nantes, Rennes, Hainbon et pluiseur autre castiel
estoient tournet à l'acord le comte de Montfort, et que nulz ne li
contrestoit. Si se doubtèrent que grans maux ne leur en venist, car
leur cité n'estoit mies forte pour yaux tenir contre ung host, ne le
pais; et si n'ooient nullez nouvellez de monseigneur Charlon de Blois:
si ques, tout consideret, le bien contre le mal, et le fort contre le
foible, il s'acordèrent au comte de Montfort et le rechuprent à
seigneur, et li fissent hoummaige et li jurèrent feaulté et l'amenèrent
à grant procession au castiel. Et là tint il sa feste, par deux jours,
dez chevaliers qui avoecq lui estoient et des bourgois de le ville; et
deffist tous offisciers et remist nouviaux offisciiers en le ville et
en le baillie de Vennes.
Au tierch jour, il (li contes) s'en parti (de Vennes) et alla assegier
ung très fort castiel seant sus ung hault terne sus la mer, que on
claimme Rocheperiot. Si en estoit castelains uns vaillans chevaliers et
mout gentils homs, que on clammoit monseigneur Olivier de Clichon,
cousins germains à celui monseigneur Olivier de Clichon qui fu depuis
decolléz à Paris, ensi comme vous orés recorder chy apriès. Et sejourna
li dis comtez devant Rocheperiot bien, à siège fet, huit jours entirs.
Oncquez ne peult trouver voie par quoy il pewist le castiel gaegnier,
si fors estoit il et en lieu si inhabitable; et si ne peut trouver
accord au gentil cevallier, par quoy il volsist obeir à lui par
proumesses, ne par manachez, qu'il li pewist faire. Si s'en parti atant
et laissa le siège et le castiel ester jusques à tant que plus grant
prouffit li venroit d'aucuns aultrez tretiéz, et puissance li
croisseroit. Si s'en vint devant ung autre castiel que on appelle au
Suseniot, où par usaige li duc de Bretaigne se tiennent pour le cause
des biaux esbas qui sont là environ, tant des bois comme dez rivièrez.
Li castelains le rendi à lui; et li laissa li contes, quant il en eut
pris le possession. Depuis chevauça et s'en vint devant castiel
d'Auroy, qui est une belle fortrèche et de grant nom; et le fist li
roys Artus jadis faire et fonder, quant il concquist Bretaigne. Si en
estoit castelains ungs moult gentilz chevaliers, que on clammoit
monseigneur Joffroy de Malatrait, qui moustra bonne chière et grant
couraige de lui deffendre. Adonc fist li comtez de Monfort logier ses
gens environ le castiel, et dist qu'il ne s'en partiroit si l'aroit à
sa vollenté.
Quant messires Joffroy de Malatrait se vit assegiet dou comte de
Montfort et oy lez manachez qu'il li faisoit, si demanda une trieuwe de
deus jours tant seullement, et là en dedens il se conssillieroit. Li
comtez li accorda liement et envoya parler à lui monseigneur Yvon de
Tigri, grandement compaignon et amic au dit monseigneur Joffroy,
liquelz esploita si bien deviers lui, et tant li dist d'une cose et
d'autre, que messires Joffroy de Malatrait rechupt le comte de Monfort
à seigneur, et le mist en le possession dou castiel et de le castelerie
d'Auroy, qui est moult belle et moult grande. Et li comtez li rendi et
li laissa par le consseil qu'il eult, et avoecq lui monseigneur Ivon de
Tigri; et les fist gardiiens de tous le pays là environ, et prist de
tous les gentils hommes le foy et hoummaige.
Puis s'en parti li dis comtez et mena son ost par devant ung autre fort
castiel asséz priès de là, que on claime Gou le Forest. Chils qui
castelains en estoit, veoit que li coens de Monfort avoit grant ost, et
que tous li pays se rendoit à lui, si que par le enort et consseil
monseigneur Hervy de Lion, que mout amoit et congnissoit, car il
avoient estet grant amy et compaignon enssemble en Grenate et ailleurs
en estraingez contrées, il s'acorda au dit comte et li fist feauté, et
demoura gardien dou dit castiel de par le comte.
Tantost apriès, li dis coens de Montfort se parti de là, et s'en alla
deviers Craais, bonne ville et bon castiel et fort durement. Dedens
Craais avoit ung evesque qui sirez en estoit, onclez à monseigneur
Hervi de Lion, si ques, par le consseil et tretiet monseigneur Hervi,
chilx evesquez s'acorda au dit comte et le recongnut à seigneur jusques
adonc que venroit avant qui plus grant droit mousteroit pour avoir la
duché de Bretaingne. Et sus cel estat en prist li comtes de Montfort le
feaulté.
Apriès ce que la ville et li castiaux de Craais se furent rendut au
comte de Monfort par le pourcach de monseigneur Hervi de Lion, cui
oncles estoit (li[404] dis) evesque, li comtez fist ses gens deslogier
et arouter vers Ju(g)on, qui est très bonne ville et forte, et y apent
ungs biaux castiaux. Dedens le ville de Ju(g)on se tenoit messires
Amauris de Clichon, frèrez mainnéz au droit seigneur de Clichon. Et
l'avoient cil de le ville pris à cappittainne pour yaux conssillier et
conforter en tous cas; et ainssi leur avoit il juret, car grandement il
estoit amés et creus, et tenoit son hiretaige assés priès de là. Se se
cloy li dis messires Ama(u)ris au devant dou comte, et dist que, se il
plaisoit à Dieu, il n'aroit jà le ville de Ju(g)on si legierement qu'il
cuidoit. Li comtez de Monfort vint par devant, et fist toutte son ost
là traire et logier; et avoit bien à ce donc parmy le communauté dou
pays quarante mille hommes, tous aidablez. Si fist ses arbalestriers
aller traire et escamucier à le ville, et d'autre part Espagnos et
Bidaus, dont il avoit grant fuison à saudées, traire, paleter et
assaillir as murés; mès peu y gaegnièrent, ainchois en y eult des
blechiéz grant foison. Quant li comtez de Monfort vit que par assault
il ne poroit avoir le ville de Jugon, il envoya querir en le chité de
Rennes quatre moult biaux enghiens qui là estoient, pour faire drechier
devant le fortrèche et chiaux de d'ens assaillir par cel estat. Che
pendant que on les estoit alés querre, messires Amauris de Clichon
parla as jones compaignons de le ville et as aucuns escuiers dou pays
de là environ, qui s'i estoient retret, tant pour l'amour de
monseigneur Amauri que pour yaux garder; et les amena à ce que, une
ajournée, il wuidièrent et se ferirent en l'ost, et y fisent mout grant
damage. Et esceirent sus le logeis monseigneur Ivon de Tigri, qui ce
meysme soir estoit là venus dou castiel d'Auroi, où li comtez de
Montfort l'avoit laissiet, et avoit amenet en l'ost bien cent lanches
de bonne gent. Si estoit logiés à l'un dez corons assés priès de le
ville de Jugon, et fu durement resvilliés, car il fu pris et navrés, et
moult en y eut des siens mehaigniés. Celle nuit avoient fet le get li
doy frère de Pennefort, messires Henris et messires Oliviers, et
entendirent le huée et le cri, et que chil de le ville estoient yssus.
Adonc ferirent il chevaux des esperons et ne prisent mies le voie pour
venir droit sur yaux, mès le chemin de le ville, et se boutèrent entre
le ville de Jugon et l'ost. Dont, ensi que messires Amauris de Clichon
et li sien s'en retournèrent vers leur ville et en menoient monseigneur
Yvon de Tigri et pluiseurs autrez prisonniers, et moult se hastoient,
car li os estoit jà durement estourmie, li doy frère de Pennefort,
messires Henris et monseigneur Olivier, bien montés et bien ordonnés et
adonc acompaigniés bien à deus cens lanches frèz et nouviaus, leur
vinrent d'encontre; et là eut grant pugneis, et de chiaux de Jugon
moult rués par terre. Quant il se virent enssi enclos entre le ville et
l'ost, et que nulle remède n'y avoit pour yaux sauver, si furent mout
esbahy et ne tinrent point de conroy, mès entendirent chacun à yaux
sauver; et laissa chacun aller son prisonnier, qui prisonnier avoit, ou
il se rendoit prison à lui pour sauver sa vie. Par celle mannière fu
delivrés messires Ives, et pris messires Amauris de Clichon, et tout
chil qui avoecq lui estoient, mort ou pris, que oncques homs ne rentra
en le ville de Jugon, dont li bourgois de le ville furent moult
desconforté.
[404] On lit dans le ms. d'Amiens: «au dit,» qui doit être une
mauvaise leçon.
Quant li comtez de Montfort seut comment messires Amauris de Clichon
estoit pris et plus de six vingt jones bourgois de la ville avoecq lui,
et messires Yves de Tigri rescous et tout li aultre, si en fu durement
liéz, et ce ne fu pas merveille. Et en loa et recoummanda grandement
les deux frèrez de Pennefort; et dist que il avoient fet une belle
bachelerie et à lui ung grant service, et que encor lor seroit il
remuneret. Si fist li dis comtez tous lez prisonniers mettre d'un léz,
et lez navrés appareillier et songneusement garder, et puis monta sus
ung cheval, acompaigniés d'aucuns des siens, et s'en vint devant Jugon,
et fist signe que il volloit parler à chiaux de dedens. Li bourgois
vinrent à lui à le barrière et l'enclinèrent, car il leur fu dit que
c'estoit li comtez de Montfort, et li fissent reverence, tant qu'en
contenanche, comme chil qui doubtoient perdre leurs amis, leurs frèrez
et leurs enffans. Là parla li comtez de Montfort et leur dist: «Entre
vous, homme de le ville, vous estez grandement fourfait enviers moy,
quant vous savés que je sui vos drois sirez naturelz par le sucession
de monseigneur le duc, mon frère, dairain trespasset. Et jà m'ont
rechut à seigneur et fet hoummaige chil de Nantez, de Rennes, de
Vennes, de Hainbon, de Craais, d'Auroi, de Gou la Forest, dou Suseniot
et des autrez forterèchez; et vous, vous estez clos contre mi et mis en
paynne de moy porter dammaige. Or est enssi avenu que chilz dammaigez
est retournéz sus vous et sus vos proismez, car je tieng vostre
cappitainne en prison et bien sis vingt dez vostrez et de le nation de
ceste ville. Si devéz savoir que je lez feray tous pendre, voyant vos
yeux, sans nul prendre à merchy, se vous ne me rendéz le ville et le
castiel de Jugon et ne me jurés feauté et hommaige. Si me respondéz
moult tost lequel vous voulléz faire des deux, ou veoir vos proismez
morir honteusement, ou moy recevoir à seigneur.» Et quant li bourgois
et li communalté de Jugon entendirent cez nouvelles, si furent tout
esbahit, ce ne fu pas merveillez. Si requisent à avoir souffrance et
consseil tout ce jour, et l'endemain, à heure de prime, il venist ou il
envoiast vers yaux, et il en responderoient ce qu'il en volroient fère.
Li comtez leur acorda, par samblant aszéz à envis, et retourna en ses
tentez. Jà estoient venut li enghiens que on avoit akariiet de Rennez,
dont li comtez eut grant joie, car il lez fist mener devant le ville et
drechier tous quatre, affin que chil de le ville de Jugon les veissent
et que il en fuissent plus effraet.
Sitost comme li comtez de Montfort se fu partis des bourgois de la
ville de Jugon, ensi que vous avés oy, il sonnèrent leur cloce et
s'asamblèrent en le place, et là parlementèrent enssamble ung grant
temps. Et remoustrèrent li plus sages et li mieux enlangagiés et chil à
qui il en touchoit le plus, le peril et l'aventure où il estoient. Ad
ce donc il ne furent nient bien d'accord; si s'ajournèrent à relevée et
alèrent chacuns disner en leurs maisons. Dedens nonne furent li quatre
enghien levet environ la ville, si que touttez mannierrez de gens
dedens et dehors les pooient veoir, qui veoir les volloient, et che
esmaya durement chiaux de la ville. Quant ce vint à relevée, il
sonnèrent de requief leur cloche et se assamblèrent, enssi que il
devoient faire. Là y eult pluiseurs parollez retournées, mès
finablement il s'acordèrent à che que, se messires Amauris de Clichons,
qui prisonniers estoit, volloit faire feauté au comte de Montfort, il
li feroient, ne jà sans lui riens n'en ordonneroient, car ensi li
avoient il juret solempnement et sus quarante mille escus de painne; si
n'en pooient riens fère sans son accord, se il ne se volloient
desloiauter et escheir en le mise. Ensi, sus cel estat, de leur
consseil il se partirent. L'endemain à l'eure qui ordonnée y estoit, li
comtez de Montfort y envoya deviers yaux le signeur de L(an)dreniaus,
son marescal de l'host. Si parlementa à yaux et il à lui, et li
cargièrent tout che que vous avés oy. Chil retourna arrière deviers le
dit comte, et li recorda le responsce et l'entention de chiaux de
Jugon. Li comtez assés s'en contenta et fist venir devant lui
monseigneur Amaury de Clichon et li dist: «Amauri, Amauri, vous avés
tort, quant contre vostre seigneur que je sui, et de ce n'est il nulle
question, volléz estriver: très grans maux vous en poroit bien prendre,
et jà estes pris, car je vous tieng en ma prison, et puis faire de vous
ma vollenté.»--«Sire, che respont li chevaliers, il est verités. Si
arés, se il vous plest, si bon avis que vous ferés de moy tout et à
point.» Che li dist li dis contes: «J'en sui tous avisés, et vous le
soiiés ossi. Ou vous me renderéz le ville de Jugon, car à vous en
tient, si comme j'en sui enformés, ou je vous feray morir à honte
avoecq tous lez autres prisonniers.» Dont se trairent avant aucun
chevalier, qui là estoient et de son linage, et li disent: «Monseigneur
Amauri, otant bien nous vorions acquitter de nostre loyaulté que vous
feriés, mès nous veons tout le pays qui se retrait deviers monseigneur
qui chy est; et sus celle entente li avons nous fait hommage, car nous
ne veons ne n'avons veut dou contraire jusqu'à orez, ne que messires
Carle de Blois y ait mis point de contredit. Si vous prions que vous
voeilliés estre des nostrez et obeir à monseigneur qui chy est; et là
où vous le ferés enssi, messires vous en sera gret, et vous pardonra
tous sez mautalens et à tous les prisonniers ossi qu'il tient, pour
l'amour de vous.» Adonc eult messires Amauris de Clichons pluiseurs
ymaginations, car il se tournoit à envis, et se li couvenoit faire ou
pis finer, ensi que li comtez li proummetoit. Tant fu enhortéz et
priiéz que il devint homs au comte de Montfort, et li fist hoummaige et
feauté. Depuis monta il à cheval, et en mena le marescal de l'host à le
ville de Jugon, et parla as bourgois, et les fist rendre et delivrer le
ville et le castiel au dit marescal, qui en prist le possession et le
saisinne ou nom dou comte. Et parmy tant, tout li prisonnier furent
quitte et delivre.
Ensi eut li comtes de Montfort le bonne ville de Jugon et le feauté de
monsigneur Amaurit de Clichon, qui depuis le servi toudis loyaument. Et
le retint li comtes de son conseil et li donna cinq cens livres de
terre bien assignées.