Parcossa[1], quando mi te vardo el viso,
Ti vardi in alto, in cielo?
Parcossa, co' mi çerco el to soriso,
Anzoleto mio belo,
Ti seri quela boca coralina
Bela come un bel fior,
E el serar de la boca piçinina
A mi me sera el cuor?...
Parcossa, co' ti parli, per un toco[2]
Resto imagà[3] a vardarte?
Parcossa a mi me trema, e no per poco,
La lengua in tel parlarte,
E co tute le tante bele cosse
Che mi da dirte go,
Me sento le ganasse[4] vegner rosse
E parlar più no so?
E parcossa, anca ti, quando te fisso
In quei gran oci bei,
Quando mi vardo quel tesoro risso
Del neri to cavéi,
Ti me deventi come 'l fogo rossa,
Ti va lontan da mi....
Dimelo, 'vanti, dime, zo: parcossa
Ti te scaldi cussì?...
Parcossa nasse mai 'ste robe quando
Nu soli se trovemo?
Parcossa mi a ti vado ripensando
Quando no se vedemo?
Parcossa mai me bate forte in peto
'Sto mio povaro cuor?...
Dime: che 'l sia cussì, bel anzoleto,
Quelo che i ciama amor?...
[1] _Parcossa?..._ = Per che cosa? Perchè?
[2] _per un toco_ = per un po' di tempo.
[3] _imagà_ = estasiato, intontito.
[4] _ganasse_ = guancie.