Tandem audite me,
Sionis filiae!
Aegram respicite,
Dilecto dicite:
Amore vulneror, 5
Amore funeror.
Huc oderiferos,
Huc soporiferos
Ramos depromite,
Rogos componite; 10
Ut phoenix moriar!
In flammis oriar!
An amor dolor sit,
An dolor amor sit,
Utrumque nescio! 15
Hoc unum sentio:
Iucundus dolor est,
Si dolor amor est.
Quid, amor, crucias?
Aufer inducias! 20
Suavis tyrannus es:
Momentum, annus es:
Tam tarda funera
Tua sunt vulnera!
Iam vitae stamina 25
Rumpe, O anima!
Ignis ascendere
Gestit, et tendere
Ad caeli atria;
Haec mea patria! 30
_Anonymous._