Tempus adest, placidis quo sol novus auctior horis
Purpureos mulcere dies, et sidere verno
Floridus, augusto solet ire per aethera vultu,
Naturae communis amor; spes aurea mundi;
Virgineum decus, et dulcis lascivia rerum,
Ver tenerum, ver molle subit; jam pulchrior annus
Pube nova, roseaeque recens in flore juventae
Felici fragrat gremio, et laxatur odora
Prole parens; per aquas, perque arva, per omnia late
Ipse suas miratur opes, miratur honores.
Jam Zephyro resoluta suo tumet ebria tellus,
Et crebro bibit imbre Jovem, sub frondibus altis
Flora sedens, audit, felix! quo murmure lapsis
Fons patrius minitetur aquis, quae vertice crispo
Respiciunt tantum, et strepero procul agmine pergunt.
Audit, et arboreis siquid gemebunda recurrens
Garriat aura comis, audit, quibus ipsa susurris
Annuit, et facili cervice remurmurat arbor.
Quin audit querulas, audit quodcunque per umbras
Flebilibus Philomela modis miserabile narrat.
Tum quoque praecipue blandis Cytherea per orbem
Spargitur imperiis; molles tum major habenas
Incutit increpitans, cestus magis ignea rores
Ingeminat, tumidosque sinus flagrantior ambit;
Nympharum incedit late, Charitumque corona
Amplior, et plures curru jam nectit olores:
Quin ipsos quoque tum campis emittit apricis
Laeta parens gremioque omnes effundit Amores. _Venus_
Mille ruunt equites blandi, peditumque protervae
Mille ruunt acies: levium pars terga ferarum
Insiliunt, gaudentque suis stimulare sagittis;
Pars optans gemino multum properare volatu
Aerios conscendit equos; hic passere blando
Subsiliens leve ludit iter; micat huc, micat illuc
Hospitio levis incerto, et vagus omnibus umbris:
Verum alter gravidis insurgens major habenis
Maternas molitur aves: illi improbus acrem
Versat apem similis, seseque agnoscit in illo.
Et brevibus miscere vias ac frangere gyris:
Pars leviter per prata vagi sua lilia dignis
Contendunt sociare rosis; tum floreus ordo
Consilio fragrante venit; lascivit in omni
Germine laeta manus; nitidis nova gloria pennis
Additur; illustri gremio sedet aurea messis;
Gaudet odoratas coma blandior ire sub umbras.
Excutiunt solitas, immitia tela, sagittas,
Ridentesque aliis pharetrae spectantur in armis.
Flore manus, et flore sinus, flore omnia lucent.
Undique jam flos est. Vitreas hic pronus ad undas
Ingenium illudentis aquae, fluitantiaque ora,
Et vaga miratur tremulae mendacia formae.
Inde suos probat explorans, et judice nympha
Informat radios, ne non satis igne protervo
Ora tremant, agilesque docet nova fulgura vultus,
Atque suo vibrare jubet petulantius astro.