Damna adsunt multis taciti compendia lucri,
Felicique docent plus properare mora.
Luxuriem annorum posita sic pelle redemit,
Atque sagax serpens in nova saecla subit.
Cernis ut ipsa sibi replicato suppetat aevo,
Seque iteret multa morte perennis avis?
Succrescit generosa sibi, facilesque per ignes
Perque suos cineres, per sua fata ferax.
Quae sollers jactura sui? quis funeris usus?
Flammarumque fides ingeniumque rogi?
Siccine fraude subis? pretiosaque funera ludis?
Siccine tu mortem, ne moriaris, adis?
Felix cui medicae tanta experientia mortis,
Cui tam Parcarum est officiosa manus.