Ah ferus, ah culter, qui tam bona lilia primus
In tam crudeles jussit abire rosas;
Virgineum hoc qui primus ebur violavit ab ostro,
Inque sui instituit muricis ingenium.
Scilicet hinc olim quicunque cucurrerit amnis,
Ex hoc purpurei germine fontis erit.
Scilicet hunc mortis primum puer accipit unguem,
Injiciunt hodie fata, furorque manus.
Ecce illi sanguis fundi jam coepit; et ecce
Qui fundi possit, vix bene sanguis erat;
Excitat e dolio vix dum bene musta recenti,
Atque rudes furias in nova membra vocat.
Improbus, ut nimias jam nunc accingitur iras,
Armaque non molli sollicitanda manu;
Improbus, ut teneras audet jam ludere mortes,
Et vitae ad modulum, quid puerile mori;
Improbus, ut tragici impatiens praeludia fati
Ornat, et in socco jam negat ire suo:
Scilicet his pedibus manus haec meditata cothurnos?
Haec cum blanditiis mens meditata minas?
Haec tam dura brevem decuere crepundia dextram?
Dextra giganteis haec satis apta genis?
Sic cunis miscere cruces? cumque ubere matris
Commisisse neces et scelus et furias?
Quo ridet patri, hoc tacite quoque respicit hastam,
Quoque oculo matrem mulcet, in arma redit.
Dii superi, furit his oculis! hoc asper in ore est!
Dat Marti vultus, quos sibi mallet Amor.
Deliciae irarum! torvi, tenera agmina, risus!
Blande furor! terror dulcis! amande metus!
Praecocis in paenas pueri lascivia tristis!
Cruda rudimenta! et torva tyrocinia!
Jam parcum breviusque brevi pro corpore vulnus,
Proque brevi brevior vulnere sanguis eat:
Olim, cum nervi vitaeque ferocior haustus
Materiam morti luxuriemque dabunt;
Olim maturos ultro conabitur imbres;
Robustum audebit tunc solidumque mori.
Ergo illi, nisi qui in saevos concreverit usus,
Nec nisi quem possit fundere, sanguis erit?
Euge, puer trux! euge tamen mitissime rerum!
Quique tibi tantum trux potes esse, puer?
Euge tibi trux! euge mihi mitissime rerum!
Euge Leo mitis! trux sed et Agne tamen!
Macte, puer, macte hoc tam durae laudis honore!
Macte, o paenarum hac indole et ingenio!
Ah ferus, ah culter, sub quo, tam docte dolorum,
In tristem properas sic, puer, ire virum.
Ah ferus, ah culter, sub quo, puer auree, crescis,
Mortis proficiens hac quasi sub ferula.