Quisquis es ille tener modo quem tua mater[93] Achilles
In Stygis aethereae provida tinxit aquis,
Sanus, sed non securus dimitteris illinc:
In nova non tutus vulnera vivis adhuc.
Mille patent aditus; et plus quam calce petendus 5
Ad nigri metues spicula mille dei.
Quod si est vera salus, veterem meminisse salutem;
Si nempe hoc vere est esse, fuisse pium;
Illa tibi veteres navis quae vicerat Austros,
Si manet in mediis usque superstes aquis; 10
Ac dum tu miseros in littore visis amicos,
Et peccatorum triste sodalitium,
Illa tibi interea tutis trahet otia velis,
Expectans donec tu rediisse queas:
Quin igitur da vina, puer; da vivere vitae; 15
Mitte suum senibus, mitte supercilium;
Donemus timide, o socii, sua frigora brumae:
Aeternae teneant hic nova regna rosae.
Ah, non tam tetricos sic eluctabimur Euros;
Effractam non est sic revocare ratem. 20
Has undas aliis decet ergo extinguere in undis;
Naufragium hoc alio immergere naufragio:
Possit ut ille malis oculus modo naufragus undis,
Jam lacrymis melius naufragus esse suis.