O ligkomeet wat links van Achernar
Jou blink vuursabel swaai,
En jarelang geduldig
Rondom die son moet draai!
O ster wat maan speel vir ou Jupiter,
Geketting maar nog vry,
En as trawant jou plig doen
Om lig as loon te kry!
O melkstraat saamgevleg uit silwerdraad
Soos wit ryp nuut-gesaai,
Wat deur die hemel kronkel
Met stukkies ster belaai!
O melkstraat, ligkomeet, en o trawant,
Verkondig hemelrond
Dit, wat die donker duister maak
Op Golgotha se grond!