They tell me o' a land whar the sky is ever clear,
Whar rivers row ower gowden sands, and flower unfading blaw,
But, oh! nae joys o' nature to me are half sae dear
As the flow'rets springing wild in our ain green shaw.
They speak o' gilded palaces, o' lords and leddies fair,
And scenes that charm the weary heart in cities far awa';
But nane o' a' their gaudy shows and pleasures can compare
Wi' the happiness that dwells in our ain green shaw.
Oh weel I lo'e when summer comes wi' sunny days an' glee,
And brings to gladden ilka heart her rural pleasures a',
When on the thorn the mavis sings and gowans deck the lea,--
Oh, then nae spot 's sae bonnie as our ain green shaw.
While Heaven supplies each simple want and leaves me still my cot,
I'll bear through life a cheerfu' heart whatever may befa',
Nor envy ither's joys, but aye be happy wi' my lot
When wand'ring in the e'enin' through our ain green shaw.