I love a sweet lassie, mair gentle and true
Than ony young, wood-loving, wild cushie doo;
Her cheeks they are dimpled, her jimp waist is sma',
She says she 's my ain lassie, dimples and a'--
Dimples and a', dimples and a'--
That bonnie wee lass wi' her dimples and a'.
Her brown wavy hair has a dark gowden tinge,
Her bonnie black e'e has a long jetty fringe,
Her footstep is light as the thistle doun's fa',
Her wee hand is lily-white, dimpled and a'--
Dimpled and a', dimpled and a'--
And I ken it 's my ain hand, dimples and a'.
I 'll wed my dear lassie, and gie her my name,
I 'll get a bit housie, and bring my love hame;
When winter is eerie, and stormy winds blaw,
She 'll mak' me fu' cheerie wi' dimples and a'--
Dimples and a', dimples and a'--
My ain bonnie wifie, wi' her dimples and a'.
When the day's wark is done, and stars blink above,
I 'll rest in her smile, and be bless'd wi' her love;
She 'll sing a' the cares o' this world awa'
Frae our cosie ingle, wi' dimples and a'.
Dimples and a', dimples and a'--
Our ain cosie ingle, wi' dimples and a'.