I 'll twine a gowany garland
Wi' lilies frae the spring;
The fairest flowers by Clutha's side
In a' their bloom I 'll bring.
I 'll wreath a flowery wreath to shade
My lassie's scornfu' e'e--
For oh, I canna bide the frown
O' Ann o' Cornylee.
Nae gilded ha', nae downie bed
My lowly lot maun cheer,
A sheilin' on the banks o' Gryfe
Is a' my worldly gear;
A lanely cot, wi' moss o'ergrown,
Is a' I ha'e to gie;
A leal heart, sinking 'neath the scorn
O' Ann o' Cornylee.
The linty 'mang the yellow broom,
The laverock in the lift
Ha'e never sang the waes o' love
O' hope and joy bereft;
Nor has the mavis ever sang
The ills I ha'e to dree,
For lovin' o' a paughty maid,
Fair Ann o' Cornylee.