O dear, dear to me
Is my ain gudeman,
For kindly, frank, an' free
Is my ain gudeman.
An' though thretty years ha'e fled,
An' five sin' we were wed,
Nae bitter words I 've had
Wi' my ain gudeman.
I 've had seven bonnie bairns
To my ain gudeman,
An' I 've nursed them i' their turns
For my ain gudeman;
An' ane did early dee,
But the lave frae skaith are free,
An' a blessin' they 're to me
An' my ain gudeman.
I cheerie clamb the hill
Wi' my ain gudeman;
An', if it 's Heaven's will,
Wi' my ain gudeman,
In life's calm afternoon,
I wad toddle cannie doun,
Syne at the foot sleep soun'
Wi' my ain gudeman.