[Sidenote: Act. 2. 3.]
[Sidenote: Rom. 6.]
[Sidenote: Mat. 28.]
[Sidenote: Mat. 27.]
[Sidenote: Joan. 20. 21.]
We undoutedlie beleif, that insamekill as it was impossibill that the
dolouris of death sould reteane in bondage the Author of lyff, that
our Lord Jesus Chryst crucifeit, deid, and buryit, quha discendit into
hell, did raise agane for our justificatioun, and distroying [of] him
who was [the] author of death, brocht lyfe agane to us that war
subject to death and to the bondage of the same. We knaw that his
resurrectioun was confirmit be the testimonye of his verray ennemeis;
by the resurrectioun of the deid, quhais sepulturis did oppin, and
thay did arise and apperit to many within the Citie of Jerusalem. It
was alssua confirmit be the testimonie of [his] Angellis, and be the
senses and jugementis of his Apostleis, and [of] utheris, quha had
conversatioun, and did eit and drynk with him efter his resurrectioun.