_Por qué ha nombre asi penitencia._
Arrepentimiento tanto es como tener home por mal la cosa que ha fecho
sin guisa, et haber voluntad de se partir della. Et por ende en latin
diz el que se arrepiente _peniteo_, que es tanto como yo me arrepiento
et duélome desta cosa, et quiérome partir della, et so aparejado para
sofrir la pena que por ende me dieren. Onde del arrepentimiento que se
face con dolor del mal que fizo, et de la pena que toma para emendarlo,
nace este nombre penitencia.